Euro 2020 - Tu nge top scorer ni dawn?

European Championship-ah champion tur a la chiang lo a, top scorer tur pawh hriatthiam a la har zel. Portugal captain Cristiano Ronaldo-a'n last 16 thleng chauh khel mah se goal nga a khung hman avangin golden boot dawng thei dinhmunah a la ding reng.

Golden Boot chu
Euro inelnaa goal khung tam ber hnenah golden boot pek ṭhin a ni a, pahnihna leh pathumna tan silver leh bronze boot a la awm. Chutihrualin pet goal zat hi a inan theih avangin a thliar hranna tur dan siam sa a ni.

Goal khungah hian mahni lama khung leh penalty shootout-a khung chhiar tel a ni lo a, chutihrualin minute 90 chhunga goal khung bakah extra time chhiar tel a ni a, World Cup-ah pawh he dan tho hi an hmang.

Player pakhat aia tam goal khung zat a inang a nih chuan assist ngah zawk chu dah hmasak a ni a, an la inan cheu chuan minute khel tlem zawk chu dah chungnun leh tur a ni a, he dan hi kum 2012 aṭangin an hmang ṭan.

Euro 2012 khan Alan Dzagoev (Russia), Mario Mandžukic (Croatia), Cristiano Ronaldo (Portugal), Mario Gómez (Germany), Fernando Torres (Spain) leh Mario Balotelli (Italy) ten goal thum ṭheuh an khung. Spain striker Torres-a'n assist vawi khat neiin golden boot chawimawin a a dawng a, Germany striker Gomez-a'n assist vawi khat nei mah se a khelh tam zawk avangin silver boot chawimawina a dawng thung.

Hmahruaitu Ronaldo
Kum 36 mi Ronaldo hi European Championship-ah record nei ṭha ber a ni a, Euro inelnaah ṭum nga tel tawhin goal a khung vek a, goal khung tam ber record chelhtu a ni.

Hei chauh hi a ni lo, Euro 2020-ah Ronaldo hian goal nga a khung a, top scorer ni thei dinhmunah a ding. Czech Republic striker Patrik Schick-a'n Denmark lakah goal a khung a, goal nga khung ve mah se assist a neih loh avangin Juventus forward hnuaiah a awm.

Goal li khung tawh pathum France forward Karim Benzema, Sweden winger Emil Forsberg leh Belgium striker Romelu Lukaku te an tla vek tawh bawk.

Ronaldo elpuite
Euro 2020-ah semifinal leh final khelh tur a la awm a, third place erawh a awm lo. Match hnih khelh tur a la awm avangin Ronaldo dinhmun a la chiang lo a, umpha thei tur an la awm.

England striker Harry Kane-a ke a hmui leh tawh a, Ukraine lakah goal hnih a khung avangin tun inelnaah goal thum a khung tawh. Tottenham striker Kane hian assist a la nei lo a, chutihrualin semifinal lut zinga team nem ber Denmark an hmachhawn dawn avangin dah bo tawp a rem lo.

Manchester City forward Raheem Sterling pawhin England tan goal thum a khung tawh a, assist vawi khat a nei tawh bawk. Three Lions player zing aṭanga top scorer an awm a nih chuan Sterling emaw Kane emaw an ni ngei ang.

Italy-in goal hnih khung tawh Ciro Immobile, Lorenzo Insigne, Matteo Pessina leh Manuel Locatelli te an kawl a; Lazio forward Immobile leh Napoli captain Insigne ten hmun nghet chang mah se an khingpui tur a hautak chhoh tawh avangin goal thum dang khung hi a awlsam lo ang.

Spain hi tun inelnaa goal khung tam ber an ni a, amaherawhchu an tlarhmaa awm top scorer tura khan ber Alvaro Morata-a'n goal khung a harsat. Chutihrualin kum 28 mi Morata hian goal hnih a khung tawh a, tun inelnaa a khelh dan thlir chuan goal thum dang khung tura rin harsa tawh mah se La Roja aṭanga top scorer an awm dawn a nih chuan ani aia rin tur an awm lo.