Copa America : Lionel Messi awmna Argentina an hmuhnawm Brazil, Argentina, Peru leh Colombia an tlang

Lionel Messi a tel chuan football mawina pholan a ni ṭhin. Argentina captain hian Ecuador lakah freekick chhuih lutin Rodrigo De Paul leh Lautaro Martinez te khung tur a siamsak bawk - La Albiceleste hian 3-0 a hnehna changin Copa America 2021 semifinal an lut.

Nimin zing quarterfinal inkhel dangah Uruguay leh Colombia te hun pangngaiah goal awm loin an inhnehtawk, penalty shootout-ah World champion hmasa ber an vanduai; Colombia lamin 4-2 in hnehna an chang.

World champion vawi nga ni tawh Brazil leh Peru ten an khingpui ve ve hnehin semifinal an lut bawk. July 6, Thawhlehni ram pahnih hian final luh an inchuh chhunzawm leh nghal dawn a ni.

Messi awmna
Argentina manager Lionel Scaloni-a'n Copa Amercia khelh chhungin team a siksawi nasa ṭhin a, quarterfinal-ah pawh a la thlak kual nasa. Tlarhma lamah erawh Messi leh Lautaro Martinez ten hmun nghet an chang.

Inter Milan striker Martinez hi a laiah awmin, a sirah Messi leh Fiorentina forward Nicolas Gonzalez ten an thlawp. Bench lamah Angel di Maria leh Sergio Aguero te an la awm bawk, tlarhma lam chu an chhah ṭha tawk.

Midfield lailum luah turin Paris Saint-Germain midfielder Leandro Paredes a dah a, tlarhnungah tawnhriat ngah Nicolas Otamendi leh Fiorentina captain German Pezzella te an inkawp thung - tun hnaia khel ṭha Cristian Romero chu squad-ah a awm lo!

Atalanta defender Romero hi hliam vangin 100%-in a fit tawk lo a, Italian club chuan an player hi chawlhtir rih turin an ngen. Tun hmain PSG chuan Argentina hnenah hian Di Maria chu chawlhtir turin an lo ngen tawh bawk.

An hmuhnawm
Argentina lamin bul an ṭan fuh a, striker Martinez-a'n keeper Hernan Galindez chu 'chip' khum mawi viau mah se, goal line a pelh hmain Robert Arboldea chuan a lo dansak hman hram - Inter Milan duhlai hian a hnu lawkah goal ban hrulah a pet chhuak zui leh bawk.

Ecuador midfielder Carlos Gruezo-a ball hloh dawngtu Messi-a'n rang zetin goal lamah a pet a, keeper in dang phak lo mah se goal ban a per hlauh. An vanduai dawn niin a lang hman a, chawlhlawk hma erawh chuan goal an nei hman.

Keeper Galindez ball dan per dawngtu Messi-a'n box chhunga ven loha awm Rodrigo de Paul a hmu fuh a, Atletico Madrid midfielder thar tur tan khung turin harsatna a awm lo, goal dang erawh a lut zui mai lo.

Goal khat an neih hnuah Argentina goal nawr a na tawk lo a, counter attack aṭangin Ecuador lamin an bei let leh zauh ṭhin. Minute 84-naah Martinez hun a thleng; Messi-a'n defender pakhat chauh a hmachhawn tawhah amaha la tlang duh loin Inter striker hi a siamsak.

Freekick
Inkhel a lo zo lo, bench aṭanga lut Di Maria-a'n penalty a hlawh chhuak niah a inngai. Mahse, video assistant referee (VAR) rawn a nih hnuah freekick pek an ni. Box pawn chiaha freekick pet turin Messi a rawn ding chhuak.

Barcelona captain hian ball dang tura player inrem (wall) pet khumin, keeper Galindez dan phak si lohin goal kilah a pet kual lut. Direct free-kick aṭanga goal 58 a khungna chiah niin, freekick chhuih luh hnem lamah legend Diego Maradona a phak lohna chu goal li chiah a ni ta.

Maradona la tluk lo deuh mah se, Messi hian freekick chhuih luh hnem lamah Cristiano Ronaldo (57 goals) erawh goal khatin a tlan pel. Copa America an match hmasa bera Chile an hmachhawn ṭumin a khung a, tunah a chhuih luh leh tak avangin a khum.

Kum 34 mi Messi leh kum 36 mi Ronaldo te hian football khelh an la chawlhsan mai dawn lo niin a lang, vanduaina lian takin a tlakbuak a nih ngawt loh chuan player ropui pahnih hian freekick dang pawh an la chhuih luh leh ngei a rinawm.

A nihna takah chuan inkhel hautak tak a ni. Eduador hmachhawn hi chu a awlsam ngai lo, an thawkrimin an che rang em em a, an la naupan hlawm avangin tharum an ngah bawk. Goal hnihna a luh hma kha chuan engkim mai kha a harsa. "Tun hma lama ka sawi fo tawh angin mimal chawimawina leh lawmman hi chu pahnihna a ni, a pawimawh ber chu team anga hlawhtlinna chan a ni. Tunah hian thil tum lian tak kan nei a, chumi tih hlawhtlin tum chuan theihtawp kan chhuah.
- Lionel Messi, Argentina captain

"Argentina khan hun ṭha tam tak insiam mah se keini lam pawhin kan insiam ve thei tho. A pawi ta ber chu kan tihsual hleka min hrem thei zel kha a ni, keini lam erawhin kan thei ve si lo. Inkhel ṭhenkhatah chuan a tisualtu leh a chhawrtu an awm a ngai ṭhin,"
- Gustavo Alfarom, Ecuador coach