Federer a tlang laiin Murray a tla
Wimbledon leh Roger Federer chu lak hran theih an ni lo, thil kalkawp leh inhmeh bik an ni. Inrinni zan khan Swiss star hian tualchhung tlangval Cameron Norrie hnehin third round a inhlangkai.
A hliam a dam hnua lo kir Andy Murray erawhin a duh ang result a nei reng thei lo. World number 1 hlui Murray hi Denis Shapovalov hneh loin third round-ah a zinkawng a tawp ve thung a, tualchhung player dang Dan Evans pawh a tla.
Roger a nghet
Harsatna hrang hrang vangin tun hnai thla 16 chhung chu Federer a inkhel tam lo. A nihna takah chuan Wimbledon atan pawh inbuatsaihna a nei ṭha tawk lo, mahse grass court inelna lian an khelh meuh chuan a thiam a la theihnghilh lo tih a lang.
Kum 39 mi Federer hian Cameron Norrie lakah hian 6-4, 6-4, 5-7, 6-4 in hnehna a chang. Season hmang ṭha ve tak Norrie tan Federer laka set khat aia tam lak chu thil harsa a la ni a, Grand Slam vawi 20 champion tawh chu a la lian mah mah.
Wimbledon bikah Federer-a'n last 16 hi vawi 18 a luh tlinna chiah a ni a, record nei ṭha ber a ni. Federer chuan, "Ka beisei aiin Norrie khan a khel thei em em a, set min chhuhsak phei kha chuan insiamṭhat ka ngai a ni tih ka hre chhuak thar.
"Set thumna lak phu khawpin a khel thei, amaherawhchu inkhel pumpui thlir chuan chak phu zawk ka niin ka hria. Major tournament-ah chuan chawlhkar hmasa zawk aṭangin a hautak ṭhin reng a ni," a ti.
Vawi riat a champion tawhna hmunah Federer hian Lorenzo Sonego a hmachhawn leh dawn. Seeded 23-na Sonego hian tun hmain Wimbledon-ah hian chak ni hmel a la hmu ngai lo, tun ṭumah erawh James Duckworth chu straight set a hnehin last 16 a lut hial.
Mangṭha Murray
Khel bawr hliam vanga a buai rei em avangin Murray-a'n hun ṭha a chan hnem a, tunah chuan Grand Slam huanga singles match khelh leh ringawt pawh atan thil lawmawm a tling ta - a match hmasa pahnihah a la chak zui!
Mahse, Britain tlangval Murray tan vanneih reng theih a ni lo. Vawi hnih a champion tawhna hmunah Murray hi Denis Shapovalov lakah 6-4, 6-2, 6-2 in a chak lo; a chak loh avangin a lungngai a, inelna lian a khelh leh theih avangin a lawm thung.
World number 1 hlui Murray hnehtu Shapovalov chuan, "Engtik niah emaw chuan Centre Court-ah hian ropui takin hnehna ka chang ve ngei ang tih hi ka ngaihtuah ṭhin a, tunah chuan a lo thleng dik ve ta," tiin a sawi.
Murray bakah hian tualchhung player dang Evans chu Sebastian Korda lakah 6-3, 3-6, 6-3, 6-4 in a chak lo. Evans hian a match hmasa pahnihah set a hloh lo a, mahse Korda hmaah erawh a service a ṭhat loh bakah tihsual a nei hnem chu a tuar.
Inkhel dang
Grass court-a inkhelh harsat ve tak Daniil Medvedev pawh a la chak zel. Russian star hian last 16 lut tur erawhin vanneihna a mamawh tel, a khingpui Marin Cilic nen set nga an khelh hnuin 6-7 (3-7), 3-6, 6-3, 6-3, 6-2 in a vannei hram.
Seeded pahnihna Medvedev hian a match lehpekah chuan Hubert Hurkacz a hmachhawn leh ang. Polish tlangval Hurkacz hi seeded 14-na ni phak a ni a, match hmasa pathumah set a hloh loh avangin hmachhawn a awlsam lo ang.
Inkhel dangah Alexander Zverev a chak bawk. German player hian last 16 lut turin Taylor Fritz chu 6-7 (3-7), 6-4, 6-3, 7-6 (7-4) in a hneh a, quarterfinal lut tur chuan Auger-Aliassime a paltlang leh a ngai dawn.
Theihna nei sang, mahse nungchang ṭha lo vanga thleng sang ta lo Nick Kyrgios erawh a inkhel tluan thei lo. Australian tlangval hian Felix Auger-Aliassime laka set khatna a lak hnuah a tihrawl a ti hliam a, set hnihna hloh zuiin a inhnukdawk chhunzawm.