Denmark thawnthu a ngaihnawm zel

Euro 2020-a an match hmasa pahniha an tlawm hnuah Denmark an insiamṭha tih a chiang a, group stage aṭanga tla thei dinhmuna ding hman khan tunah chuan a thiam pali zingah an hming an nem kai ta!

Inrinni zan khan Denmark hian Euro semifinal lut turin Czech Republic chu 2-1 in an hneh a, Thomas Delaney leh Kasper Dolberg te chuan goal khat ve ve an khung.

Czech tan Patrik Schick chuan tun inelnaa a goal ngana khung mah se a team a chhandam zo chuang lo a, Netherlands hnawtchhuaktu team hian quarterfinal-ah Euro an mangṭha.

Denmark-in kum 1992-a an champion hnua semifinal an khelh lehna hmasa ber tur a ni a, hmana thawnthu ngaihnawm tak an lo ziah tawh kha chhunzawm tumin rilru an seng ṭan leh der tawh ang.

A rei lo
Team pahnih theihna inthlau lo mah se squad pumpui thlirin Denmark-in rin an hlawh zawk a, Kasper Hjulmand-a naute hian chu rinna tihlawhtling tur chuan hun an mamawh rei lo.

Minute ngana lekah Thomas Delaney a rawn inlar a, Borussia Dortmund midfielder hian amah vengtute lak aṭanga tal chhuakin Stryger Larsen-a corner chu a tauh lut a, training-naa an zir dan thlap niawma mawi a ni.

Denmark-in inkhel an thunun chhunzawm a, minute 42-naah Kasper Dolberg chuan Joakim Maehle ball cross duhthusam chu an goal hnihna ni turin a volley goal a, Czech team an hawihai takzet.

Kasper Dolberg hian tun inelnaah goal thum a khung tling ta der a, kum 23 mi striker hmabak nei êng hian top scorer ni turin beiseina a la nei.

A hming Schick
First half inkhelah Czech lamin chance nei ve bawk mah se an hun ṭha neih an chhawr hleithei lo a, Denmark-in chawlhlawk hmaa goal hnih an neih bawk avangin awlsam takin an chak mai dawn niin a lang hman.

Mahse, Czech-in 'star' thar an nei a, a hming chu Schick a ni. Kum 25 mi striker hian second half ṭan aṭanga minute lina lekah si phurh a rawn sut ṭhen a, Czech an phur thar sawt - mahse, rei erawh daih loin an zuih zui a, an tlawm.

Czech tan chuan quarterfinal thlen pawh hi chanchin lawmawm a tling a, 'star' thar an nei ta bawk - Cristiano Ronaldo ngaisangtu Schick hian tun inelnaah a striker ngaihsan goal khung ang zat, goal nga a khung tling ta.

AC Milan-in lakluh an duh nia sawi, Bayer Leverkusen striker hian Ronaldo anga assist a neih ve loh avangin top scorer erawh a ni thei dawn lo a, Ronaldo nen tlar khata an hming tarlan a ni ringawt pawh ani tan erawh chawimawina ropui

Denmark an thiamEngland leh Denmark ten Thawhlehni zanah semifinal an khel dawn a, Three Lions fan-ten he Danish team hi an lo zuam viau a nih chuan an tisual ang.

Czech lakah pawh Denmark tlarhnungin fak an phu a, goalkeeper Kasper Schmeichel piahlamah tlarhnunga ding ho Andreas Christensen, Simon Kjaer leh Jannick Versergaard ten an khel ṭha hle.

Tlarhmaah duh thlan tur Dolberg leh Yussuf Poulsen an awm tak avangin tun inelnaa goal la chhuah lo England tum an châk tawh ang tih a chiang a, he team hi Christian Eriksen tel lo pawhin an ṭha.

He team chakna hnar ber chu an inlungrualna hi a ni, tiin an sawi ṭhin a, Eriksen-a chunga thil thleng khan team boruakah inpawhna leh inngainat tawn lehzualna a siam a, 'thawhhona ṭha' chu an chhuan ber a ni.

Eriksen a tan
Denmark-in Euro 2020-a an match hmasa berah Finland an hmachhawn a, minute 41-naah an thiampuipa Christian Eriksen chu nikhaw hre loin a tlu.

Khami ṭuma thil thleng kha nimin lawka thleng ang maiin mitthlaah a la cham reng a, a hmuna tawngtute tana a rapthlak turzia hi sawifiah sak chi a ni lo - coach Kasper Hjulmand chu media-a hmachhawnnaah a mittui a tla hial.

Denmark boss chuan, "Ni tinin Eriksen hian ka thinlung a la luah reng a, kan zingah tel ve se aw tiin kan la ngaihtuah fo mai. A damchhuah leh avangin kan lawm takzet a, kan rilruah a cham reng.

"Czech nena kan inkhelah pawh khan kan rilru a luah reng a, Wembley-ah pawh kan thinlunga Eriksen hre reng chungin kan khel leh ang. Engtiklai pawh hian ka ngaihtuahnaah a cham reng a ni," tiin a sawi.