Hawks aia chungnung zawk Bucks

Milwaukee Bucks chuan Atlanta Hawks hnehin Eastern Conference title an la a, kum 1974 hnua a vawi khat nan NBA Finals an lut ve leh ta - Phoenix Suns nen nomawi an inchuh leh ang.

Nimin zing khan Eastern Conference Finals game 6 khelh niin, rinkai Bucks hian 118-107 in hnehna an chang a, best-of-seven series chu 4-2 a lain game 7 khelh a ngai lo, an chak tlang nghal.

Hliam vangin Giannis Antetokounmpo a la inkhel ve thei lo a, an thiampuipa awm loh karah Khris Middleton chuan point 32 a nei a, ani bakah hian point 27 neitu Jrue Holiday a khelh ṭhat bawk avangin an tlang.

Bucks chakpuitu Middleton chuan, "Ka ṭhiante leh kan coach-in na zawka bawh turin thurawn min pe, an duh ang ngeiin basket neih tumin theihtawp ka chhuah a, hnehna kan chan hi kan zavai thawhrah a ni," tiin a sawi.

NBA Finals hi July 7, Nilaini zing dar 6:30 hian Talking Stick Resort Arena-ah game 1 an khel ang.