Chile lakah Brazil an vannei
Player kim loa hun chanve vel khel Brazil lamin an goal neih chhun an venghim tluan thei a, harsa taka Chile hnehin Copa America 2021 semifinal an lut - final lut tur chuan Peru an paltlang leh a ngai dawn.
Inrinni zing quarterfinal inkhelah Brazil tan Lucas Paqueta chuan minute 46-naah goal awmchhun a khung, goal an neih aṭanga minute hnih a liam hnu lekah Gabriel Jesus chu hnawhchhuah ni mah se Tite naute an ṭang tluan thei.
Goal khat a tawk
Tite-a'n tlarhma lamah Neymar, Jesus, Roberto Firmino leh Richarlison te bul a ṭan rualtir vek, goal khung an tum tih chua a chiang - anni pali hnungah hian Manchester United leh Real Madrid midfielder Fred leh Casemiro te an awm bawk.
Brazil lamin attacking game khel mah se hun chanve hma lam chu Chile an inveng thei. Chawlhlawk hnu lawkah substitute Lucas Paqueta chuan Neymar nen an in one-two hnuin defender Gary Medel a paltlang a, keeper Claudio Bravo pawhin a dang zo bik lo.
Goal an neih avangin Brazil hi chak chiang tura ngaih an ni nghal. Mahse striker Jesus-a'n ball lak a tumna lamah Eugenio Mena laka ke a lek san bakah a hlauhawm avangin hnawhchhuah a ni a, an ṭhiante chu kim loa khel turin a chhuahsan.
Player tam zawk Chile lamin bei let viau mah se an vannei tawk lo. Hliam dam hlim Alexis Sanchez-a'n hun ṭha a insiam hleithei lo a, striker Eduardo Vargas-a'n ṭha takin vawi hnih pet mah se Alisson Becker aia lut Ederson Moraes a paltlang thei lo.
Fiahna paltlang
Hnehna an chan hnuah Neymar chuan, "Chile hi chu team ṭha tak an ni, an tlarhnung, midfield leh tlarhma pawh an ṭha vek, kan tan chuan anni hneh hi fiahna lian tak a tling. Player zawng zawng kan khelh ṭhat vangin kan chak hram.
"Jesus kha chu a vanduai, ball chauh en chungin a ke a lek a, player kha a melh tel loh avangin hrem a tawh phah," a ti. Copa America an champion hnuhnung berah khan Neymar hi hliam vangin a tel thei lo, tun ṭumah hian champion a tum ruh hle.
Chile midfielder Arturo Vidal chuan, "Team ṭha leh champion tura rinkai kan tum a, an rama khel an nih bawk avangin engkim mai kha a harsa. Chak loh chu a hrehawm, mahse kan hneh loh team leh kan khelh dan thlir chuan inthlahrunna tur a awm lo," a ti.
Copa America 2015 leh 2016 khan Chile hian nomawi an chawi, tun ṭumah erawh beisei an phak lo. Group A lamah palina ni chungin quarterfinal an lut hram a, group B lama hmahruaitu an tum a ngaih avangin an zinkawng a tawp hma.
Hmabak Peru
Inrinni zing inkhel dangah Peru leh Paraguay te hun pangngaiah 3-3 in an inhnehtawk a, penalty shoot out-ah Peru hi 4-3 in an chak - Ricardo Gareca enkawl team hian a zawna vawi hnih nan semifinal an inpet kai.
Paraguay tan hian David Martinez, Braian Samudio leh Alberto Espinola ten penalty an hlawh vek - Peru tan Miguel Trauco chuan chakna goal a khung a, an hmabak chu Brazil a ni dawn.
Copa America hnuhnung berah khan Brazil leh Peru te hi final-ah an intawng a, Selecao (Brazil sawina) lamin 3-1 a hnehin nomawi an chawi a, tun ṭumah erawh final hmain ram pakhat zawk an tla ang.
Peru coach Ricardo Gareca chuan, "Kei chuan inkhel boruak sang leh danglam tak te hi a nuam ka ti ṭhin, chutiang chu Paraguay lakah kan tawng a, semifinal-ah a aia hautak leh khauh zawk kan hmachhawn leh dawn, ka naute hi ka ringtawk hle," tiin Tite naute an hlau bik lo.