Colombia chakna keeper Ospina

Luis Suarez leh Edinson Cavani te awmna Uruguay-in goal an khung thei lo a, hun pangngaiah Colombia nen goal awm loin an inhnehtawk. Penalty shootout neih zui niin, penalty vawi hnih dangtu David Ospina-a'n an ram chu 4-2 in hnehna a chanpui.

Arsenal keeper hlui, Colombia tana match 112-na kheltu Ospina hian Uruguay player - Jose Maria Gimenez leh Matias Vina te chhuih a dansak a, Suarez leh Cavani ten khung mah se Uruguay tan a tawk zo lo.

Colombia tana pettu - Duvan Zapata, Davinson Sanchez, Yerry Mina leh Miguel Borja ten an khung vek. Colombia hian final thleng tur chuan Messi awmna Argentina an paltlang leh a ngai dawn.

South America ram 10 inelna neih laiah hian, quarterfinal, semifinal leh pathumna zawnna inkhelah chuan extra time khelh a ni dawn lo; hun pangngaiah an inhnehtawk a nih chuan penalty hmanga chak zawk zawn nghal a ni. Final bikah erawh an inhnehtawk chuan extra time an khel ang.

Ram tana match khel hnem ber Ospina chuan, "Hnehna kan chan hi kan ram mipui tan a ni. Hri leng vangin harsatna leh buaina kan tawk a, lungngai taka kan awm laiin football hmangin lawmna kan tawng," a ti.

Copa America hi a tirah chuan Argentina leh Colombia ten an inthlen ṭawm tur a ni, mahse hri leng vangin an inhnukdawk. Hun tepter tawh takah Brazil kutah hlan an ni a, a hmuna entu awm loin an khel a ni.