Semifinal-a Spain hruai thlengtu Unai Simon

Luis Enrique-a'n Euro 2020 atan thutlukna huaisen a siam a, khawvela keeper manto ber Kepa Arrizabalaga chu squad-ah a tel lo a, Manchester United goalkeeper David de Gea aiah tawnhriat nei tlem zawk Unai Simon a thlang.

Kum 24 mi Simon hian Enrique rinna a chhanglet a, penalty shootout-ah La Roja a chakpui. Zirtawpni zan Euro quarterfinal inkhelah Spain leh Switzerland te hun pangngaiah 1-1 in an inhnehtawk a, keeper Simon-a chet ṭhat zarah penalty shootout-ah 3-1 in an chak.

Xhaka tel lohna
Switzerland-in hrem vangin Granit Xhaka an chhawr thei lo a, goal venhim tumin bul ṭan mah se Xhaka aia lut Denis Zakaria-a'n Spain wing back Jordi Alba goal khung tur dan a tumna lamah an lamah a dang lut. La Roja-in goal an khung hian minute riat chiah a la ni a, Swiss player pawimawh Breel Embolo a inhliam zui avangin Enrique hote awlsam taka chak tura beisei an ni.

Amaherawhchu Xhaka tel lo chungin Switzerland an khel ṭha a, Borussia Dortmund defender Manuel Akanji-a'n goal a venghim ringawt lo, set piece-ah goal a khung teuh ṭhin hle.

Spain tlarhnunga ding Pau Torres leh Aymeric Laporte te an talbuai a, minute 68-naah Xherdan Shaqiri-a'n Switzerland siphurh sutna goal a khung a, inkhel a nung hle.

10 vs 11
Minute 77-naah Swiss midfielder Remo Freuler-a'n substitute Gerard Moreno a tlawh a, referee Michael Olivier-a'n red card a pe. Switzerland-in player 10-a an khelh hnuah loh theih loin goal venhim a ṭul a, Spain tlarhma bil an vanneihpui bawk.

Moreno leh Spain tlarhmaten chance ṭha an hlah a, player 10-a khel Switzerland lamah goal an khung thei lo. Extra time khelh hnuah pawh goal a luh chuan loh avangin penalty hmangin chak zawk zawn a ṭul phah.

Spain an vannei
Switzerland-in World champion France hnehin quarterfinal an lut a, penalty shootout-ah Spain captain Sergio Busquets-a'n a hlah nghal a, Swiss forward Mario Gavranovic-a'n chiang takin a pet goal thung. La Roja an hlauthawng a, amaherawhchu Dani Olmo-a'n penalty a pet luh hnuah Simon-a'n a tih tur a rawn ti.

Spain keeper Simon hian Fabian Schar a dansak a, Swiss keeper Sommer-a'n Rodri pet a dansak ve thung. Athletic Bilbao keeper Simon-a'n defender khel ṭha Akanji pet a dang a, Moreno-a'n a tihsual thup nan a pet goal ta bawk.

Switzerland tan a vawi lina pettu Ruben Vargas-a'n a pet over a, Spain dinhmun a ṭha. Real Sociedad forward Mikel Oyarzabal-a'n La Roja chakna goal a khung a, penalty vawi hnih dangtu Simon-a lamah tlan phei nghalin chak an lawm.

Spanish football hrechiangtute chuan Real Sociedad leh Athletic Bilbao te inhalzia an hria ang a, he club-a khel player pahnih hi Spain-in hnehna an chan avangin lawm vangin an inkuah a, a hmuhnawm danglam hle.

Spain hero Simon
Croatia nen an inkhelh ṭumin Pedri back pass chu keeper Unai Simon-a'n a dang ṭhelh a, an lamah a lut. Simon-a tihsual lian mah se Spain boss Enrique-a'n a ring chhunzawm.

Inkhelh banah Simon chuan, "Luis Enrique nen kan inbia a, amaherawhchu coaching staff-te nena an thu min hrilh hi mipui hriata puanzar ka tum lo. Hnehna changa inhmaa ka rawn ṭhu thei hi ka lawm hle a ni," tiin a sawi.

Spain keeper hi star of the match-a thlan a ni a, Simon chuan, "Ka chawimawina dawn hi midang hnena hlan chhawn tur chu ni se Yann Sommer hnenah ka hlan ang. Ani kha a khel ṭha thlawt," tiin Switzerland keeper a fak.

Player inlante
Switzerland: Sommer; Elvedi, Akanji, Rodríguez; Widmer (Mbabu 100'), Freuler, Zakaria (Schar 101'), Zuber (Fassnacht 90+2'); Shaqiri (Sow 81'), Embolo (Vargas 23'); Seferovic (Gavranovic 82')

Spain: Unai Simon; Azpilicueta, Pau Torres (Thiago Alcántara 113'), Laporte, Alba; Koke (Llorente 90+1'), Busquets, Pedri (Rodri 119'); Sarabia (Olmo 46'), Morata (Gerard Moreno 54'), Ferran Torres (Oyarzabal 91')

Inelna ṭan hma aṭangin team ṭha pasarih aṭanga pariat zinga kan tel thu ka sawi a, ka ṭawng uar lo. Tunah chuan pali zingah kan tel tawh a, champion kan tum dawn a ni.
- Luis Enrique, Spain coach

Ka rilru a phir rih hle. Ka player-te ka chhuang a, kan thlen chinah kan lawm tur a ni. Chutihrualin semifinal kan thleng teuh a, hetiang dinhmuna din hi a harsat avangin kan chak ta lo hi pawi ka ti hle. Eng pawh chu ni se lungngaihna aiin lawmna tur ka ngah zawk.
- Vladimir Petković, Switzerland coach

Kan team ka chhuang hle. Penalty chu 50-50 a ni a, engpawh a thleng thei. Penalty ka en khan ka zam a, vanneihna kan neih loh vang chauha chak lo kan ni.
- Xherdan Shaqiri, Switzerland forward