MFA Futsal League a hnai

MFA Futsal League chu January 9, Thawhlehni aṭangin Dengṭhuama Hall-ah khelh ṭan a ni dawn. January 5, Zirtawpni zan hian Chanmari YMA Hall-ah kickoff neih a ni ang.

Futsal League khel tur hian September-October, 2017 chhung khan playoff khelh a ni a. Aizawla veng 16 - Armed Veng South, Bawngkawn, Bungkawn, Chanmari, Chhinga Veng, Dawrpui, Dinthar, Durtlang, Electric Veng, Kanan, Laipuitlang, Ramhlun North, Ramhlun South, Ramhlun Venglai, Ramthar leh Saron Veng te chu inelna hmachhawn turin an tling.

Team 16 te hi group hnihah team pariat ve vein ṭhen an ni dawn a, a sang pali ve vein knock­out stage an lut ang. Quarterfinal leh semifinal hi double leg a khelh tur a ni. Futsal League atan hian Mizoram Football Association leh Zonet Cable TV te chuan kum thum chhung atan inremna an ziak a, Zonet hian hemi chhung hian kum tinin Rs 5,10,000 an pe ṭhin dawn a ni.