Khawvel defender manto ber Van Dijk

Liverpool chuan khawvel defen­der manto ber ni turin Virgil van Dijk chu Southampton aṭangin pound maktaduai 75 in an lalut. Dutch defender Van Dijk hian Manchester City-in Monaco aṭanga pound maktaduai 52 senga an lakluh Benjamin Mendy man a khum a ni.

Reds hian December thla khan Saints nen Van Dijk chungchangah inremna an neih thu puang tawh mah se transfer hun hawn January 1-ah an ziaklut thei chauh. Liver­pool manager Jurgen Klopp chuan kum 26 mi defender lakah a hmanhmawh loh tur thu a sawi a, Van Dijk-a'n Reds kawr nena a inlan hun tur a la chiang lo.

Liverpool hian kumthar niah Burnley 2-1 in an hneh a, defender an mamawh tih a lang nawn. Reds hian Sadio Mane hmangin minute 61-naah hma an hruai a, Klopp-a naute tan point thum hlawh chhuak turin goal venhim chauh tawk tawh mah se Burnley-in minute 87-naah Johann Berg Gudmundsson hmangin an sut. Hun tawpah erawh Liverpool an vannei a, injury time-a defender Ragnar Klavan-a goal khung zarah hnehna an chang hram.

Van Dijk manin sawi zui a hlawh a, amaherawhchu Reds mamawhna leh tun hnaia player man chhut chuan Klopp-a tan chuan tih theih dang a awm lo. Nipui transfer hun lai khan Reds hian pound maktaduai 60-in Van Dijk hi lakluh an tum a, Saints-in an hnawl sak avangin season chanve hnuah pound maktaduai 15 belh lehin an duh tak defender hi an lalut ta ni.

Transfer boruakah Liverpool an buai chho zui dawn a, an player pawimawh Philippe Coutinho chu thawmhnaw siamtu lar Nike-in Barcelona zawm tur angin an ziak. Reds hian nipui khan Catalan club dilna pound maktaduai 118 chu an hnawl tawh a, Brazilian midfielder Coutinho hmalam hun a chiang lo.

Liverpool hian Zirtawpni zan hian FA Cup third round-ah Everton an hmachhawn dawn a, defender thar Van Dijk, Coutinho chungchang leh inhliam vanga Mohamed Salah dinhmun la chian loh vangin Merseyside derby hian ngaihven a hlawh ang.