Kerala Blasters-in coach an ban

Indian Super League (ISL) club Kerala Blas­ters chuan season bul an ṭan ṭhat loh em avang­in an head coach Rene Meulensteen chu Thawhlehni khan an ban.

Manchester United assistant coach hlui hian December 31 zan khan Bengaluru FC lakah a naute hi 3-1 in a tlawm pui. League match 10 an khelh tawhah vawi khat chiah hnehna an la chang a, point sarih hmuin season hmasa pahnihna hi tun dinhmunah league table-ah pariatna an nih avangin coach hian a tuar.

Blasters hian Dutch coach Meulensteen thlak­tu tur an la puang lo a, assistant coach Thangboi Singto chuan a enkawl lailawk dawn a ni.

ISL club langsar Ke­rala Blasters neitu zingah Sachin Tendulkar a tel a, tun season-ah hian hmasawn tumin pla­yer langsar pawh an lalut nual. Tottenhman leh Man­chester United striker hlui Dimitar Berbatov leh Wes Brown te bakah Sandesh Jhingan leh CK Vineeth te an nei a, Mizo tlangval Lalruatthara'n hmun pawi­mawh a chang pha bawk.

Zanin dar 8:00-ah Ke­rala Blasters hian Pune City an mikhual dawn a, Zirtawpni zanah Jamshedpur leh Mumbai City an inkhel bawk ang.