Sharapova-i'n hnehna nen bul a ṭan

World number 1 Simona Halep leh Grand Slam vawi nga champion tawh Maria Sharapova te chu tun season-a an match hmasa berah hnehna an chang nghal.

Shenzhen Open round of 32-ah Sharapova hian darkar khat leh minute 22 chhungin Mihaela Buzarnescu chu 6-3, 6-0 in a hneh. Russian nula hian a ball vuak nat a chhawr

ṭangkai leh a, winners vawi 18 vuain game khat mah a hloh lo a ni.

Sharapova chuan, "Match awlsam a awm lo a, player an ṭhain hnehna chan duh mi vek an ni. Kei chuan ka khingpui tur chiah ka ngaihtuah ṭhin a, tunah pawh match lehpek atan rilru ka seng nghal," a ti. Sharpova hian Zarina Diyas a hmachhawn leh ang.

Inkhel dangah Romanian nula Halep chuan aces vawi thum a vuak bakah winners vawi 12 vuain Nicole Gibbs chu 6-4, 6-1 in a hneh. Nimin khan Halep hian Chinese nula Duan Yingying a hmachhawn leh a, he thu buatsaih lai hian result kan hre hman lo.