A chung berah Awadhe Warriors
Vodafone Premier Badminton League khelh laiah Awadhe Warriors chuan Ahmedabad Smash Masters chu 4-3 in an hneh. Awadhe hian match thum an khelh tawhah point 12 hmuin table hmahruaitu an ni a, chak lo zawk Ahmedabad erawh pathumnaah an awm thung.
Thawhlehni zan khan PBL inkhelah team pahnih an intum tawk hle a, 3-3 a nih hnuah mipa doubles hmangin chak zawk tur chinfel a ni. Match pawimawh takah hian Hendra Setiawan leh Tang Chun Han te ṭangdun chuan Kidambi Nandagopal leh Lee Chun Hei Reginald te chu 15-14, 15-10 a an hneh zarah an club khelhna Awadhe Warriors chu PBL season lina hmahruaitu an ni.
Mipa singles inkhelah world number 10 HS Prannoy chuan a khelh ṭhat a chhawm nung zel, Indian shuttler pahnih intawngah Ahmedabad star Prannoy hian world number 3 Kidambi Srikanth chu 15-8, 15-11 in a hneh.
Ahmedabad Smash Masters player Prannoy hian season hmasa aṭangin PBL-ah hian chak loh a la nei lo a, a zawnin match 10 hnehna a chang tawh; Srikanth erawh tun season chhungin vawi hnih a chak lohna a ni thung. Hmeichhe world number 1 Tai Tzu Ying chuan tualchhung nula langsar Saina Nehwal chu 15-5, 15-14 in a hneh.
Indian shuttler Prannoy hian nikum tawp lam khan Srikanth hnehin a vawi khat nan Senior National Championship nomawi a chawi tawh bawk a, vanglai hmang mek Srikanth nen an intawn hnuhnung pahnihah hnehna a chang tihna a ni.
Prannoy chuan, "Kan team tana point ka hlawh chhuak thei kha ka lawm a, match 10 chhung hnehna ka chang thei hi a lawmawm dan a dangdai hle a ni," tiin a sawi.
Awadhe Warriors tan hian mixed doubles pair Christina Pedersen leh Tang Chun Man ten game hmasa an hloh hnuah Kamilla Rytter Juhl leh Law Cheuk Him te chu 14-15, 15-12, 15-14 a hnehin beiseina an siam thar a, anni pahnih bakah hian Parupalli Kashyap pawhin a khelh ṭhat chhunzawm nan Sourabh Verma lakah 11-15, 15-13, 15-14 in hnehna a chang bawk.
PBL-ah hian team pariat an inlan a, an inkhelh kual hnuah a sang paliin knockout round an lut ang. Match tinah hian vawi nga an inkhel a, regular match bikah a chak zawkin point khat hmuin a chak lo zawk tan point a awm lo thung. Trump Match bikah a chak zawkin point hnih an hmuh laiin a chak lo zawk chu point khat paih sak (-1) an ni thung.