Dembele a inlan an beisei

Barcelona player manto ber Ousmane Dembele chu hliam vanga thla li deuhthaw a chawlh hnuah a dam tawh a, Inrinni zana Levante nen an inkhelh hunah a inlan theih tawh beisei a ni.

Kum 20 mi Dembele hian nikum nipui bazar lai khan Borussia Dortmund aṭangin pound maktaduai 135.5 in Catalan club hi a zawm, a club thar tan match thum chiah a khel hman tihin a malpui a hliam, tun thlengin match pangngai a la khel leh rih lo.

Ernesto Valverde kaihhruaina hnuaia La Liga hmahruaitu Barcelona hian Krismas chawlh an neih hnuah Thawhlehni aṭang khan training an nei ṭan leh tawh. Player langsar Lionel Messi, Luis Suarez leh Javier Mascherano te chuan training hi an zawm nghal.

Barcelona hian match 17 aṭangin point 45 hmu tawhin anmahni hnaih bertu Atletico Madrid aiin point kua zetin an sangfal tawh a, an dinhmun a him riha ngaih a ni. League lamah an dinhmun ṭha viau mah se Champions League khelh tur an nei chho dawn; Premier League champion Chelsea nen February hian last 16 an khel ang.