Football ka ngai takzet a ni - Jurgen Klopp

Liverpool manager Jurgen Klopp chuan Covid-19 vanga inkhelh chawlh chhung zawng khan football chu a ngaih takzet thu a sawi a, "Ka team ngaihawm em em te nena kan awm ho leh thei ta hi ka hlim takzet a ni," a ti. 

Premier League-ah Liverpool hian point 25-in hma an hruai fal mek a, kum 30 hnua a vawi khat nan league nomawi chawi thei dinhmunah an ding mek. 

Klopp chuan, "Awihawm loh khawpin ka ngai zawk a ni. Football hi kan nuna thil pawimawh ber a ni lo tih chu ka pawm thlap a, mahse ka tuina ber a ni miau si. Mipuite pawhin Premier League khelh chhunzawm tur hi keimahni ang thoa nghakhlel taka an thlir kan beisei tlat a ni," a ti. 

June 17-a Premier League khelh ṭan a nih hunah Manchester City chuan Arsenal an hmachhawn dawn a, he inkhela City hi an tlawm chuan Reds hi league match an khelh leh hmasak berah an champion thei dawn tihna a ni. 

Liverpool tan nomawi chu ban phak mai angin lang mah se Klopp-a'n Premier League-a la 'lap' duh lo a, nomawi chawi tur chuan tih tur tam tak an la neih thu a sawi. Klopp chuan, "Champion ngaihtuah hi thil nuam tak a ni a, mahse champion erawh kan la ni lo," a ti.  

Klopp chuan sawi zawmin, "Kan hnaih tawh tih chu kan hai lo a, mahse kan la thleng lo. Kan hmaah point 27 a awm a, hlawhchhuah vek kan tum ang. Kan la champion lo. Inkhelh kan la hmabak a, chak kan la mamawh reng a ni," a ti a, match zawng zawng a ngai pawimawh. 

German coach chuan, "Game hnih hnua inthlahdah mai emaw kan tum lo. Result chiang sa ka hmu ve lo a, kan theihtawp kan chhuah a ngai a ni," a ti. 

May 28 aṭang khan Premier League player-te chuan taksa insiin training an nei ṭan leh tawh a, kartin vawi hnih tal test an nei ṭhin dawn thung. 

Premier League match 92 khelh tur a la awm a, match zawng zawng hi entu awm loa khelh vek tur a ni. Liverpool captain Jordan Henderson chuan Anfield-a entu awm loa khelh a, mipui tel loa nomawi chawi chu thiam a har tur thu a sawi. 

Mahse, Klopp chuan fan-te nen champion an lawm ngei tur thu a sawi a, fan-te tana punkhawm a him hunah khawpui fanga an nomawi an lawm tur thu a sawi bawk. 

Klopp chuan, "Kan champion a nih phawt chuan team chhungkuaah kan lawm ang a, phalna kan neih ve leh fan-te nen kan lawm bawk ang. Ka tiam a che u, parade kan nei em em ang. 

"A hun chu eng pawh ni se - kan parade ang! Kan vaia kan chhuah theih hun kan nghak ang a, chumi hunah chuan kan ti mai ang," a ti a, nomawi nena Liverpool khawpui fan a tum hle. 

Football-a venhimna lam kalpuitu Police hotu zinga mi Mark Roberts chuan mipui sa himna atan league match ṭhenkhat chu neutral venue-a khelh a lo sawi mawi tawh a, match zingah hian Merseyside derby leh Liverpool-in nomawi an chawi theihna tur inkhel zawng zawng an tel.

Hetihlai hian Merseyside Police-te chuan Goodison Park-a derby khelh a rem lohna tur an hriat loh thu an lo sawi tawh a, venhimna kalpui an inhuam - Liverpool khelhna tur pawh a chiang hleithei lo tihna a ni a, an champion hma chu neutral venue-a an khelh a ngai mai thei. 

Mahse, Klopp chuan hei hi ngaih pawimawh berah a nei lo. Borussia Dortmund boss hlui chuan, "Anfield-a inkhelh chu chak mah i la neutral venue-a khelh ngai pawh ni se buaina ka nei lo - fans ber an awm theih loh chuan a hlutna enge awm chuang?

"Stadium ruaka khelh kan thiam theih nan stadium-ah training ka nei lawk a ni," a ti a, neutral venue-a khelhin a tihbuai loh thu a sawi. 

Klopp chuan a player-te an ṭhat thu a sawi a, fixture hautak hmachhawn reng renga hun hmang a player ṭhenkhat chuan kum tam tak hnuah hahchawlhna hun an neih ve tak thu a sawi!

Liverpool tana Champions League nomawi chawitu coach chuan, "Players ṭhenkhat chu nikum nipui laia season kan ṭan dawn lai ai khan an ṭha tawh zawk a ni. Season kan ṭan meuh chuan kar li vel kan awm ho tawh dawn. 

"Nipui chawlh kan hman zawha season kan ṭan leh chiah hian kan nih dan tur hriatthiam a har ṭhin hle a, chutiang dinhmunah chuan tunah pawh hian kan ding a ni. Match kan khelh leh hmasak ber aṭangin theihtawp kan chhuah ang," a ti. 

Liverpool hian tun season-a Premier League match 29 an khelh tawhah vawi 27 hnehna an chang a, vawi khat chiah tlawm an la nei a ni.