Ryan Giggs-a'n Wales enkawl dawn?

Wales international hlui John Hartson chuan Ryan Giggs chu Wales manager atana thlan a nih a rin thu a sawi.

Hartson bakah hian amah ang bawka Wales forward hlui Craig Bellamy leh Chris Coleman-a assistant Osian Roberts te chuan manager nih an duh thu an sawi lang tawh a, Coleman thlakna tur erawh tihchian a la ni lo.

Celtic forward hlui Hartson chuan Football Association of Wales chief executive Jonathan Ford nen an inbiak hnuah manager hna hi a beisei loh thu a sawi a, Giggs chu manager tur a rin ber a nih thu a sawi.

Kum 42 mi Hartson chuan, "Ryan hian a duh a nih chuan a lar avangin an thlan mai a rinawm. Manager chungchang hi supporter-te an zawt a nih pawhin Giggs hi an pawm ka ring. Ani hi chu a langsar a, Welsh legend a ni," tiin a sawi.

Wales manager hlui Mark Hughes leh Wales winger hlui Mickey Thomas te pawhin Giggs chu manager atana a ṭhat a rin thu a sawi ve bawk.