Murray dinhmun a ṭha lo

World number 1 hlui Andy Murray chu a khel bawr na a la dam thei lo a, Australian Open atana inbuatsaihna Brisbane International aṭanga a inhnuhdawh hnuah zai ngai thei dinhmunah a ding mek.

Kum 30 mi Murray hi a hliam vang hian nikum July thla hnuah a la inkhel leh lo a, tun dinhmunah world ranking-ah pawh number 16 a ni tawh. Britain tlangval chuan Instagram lamah a dinhmun tarlangin, "Zai loh hi ka duhdan a ni a, kawng a awm chuan pumpelh hram ka duh. Zai ngai loa awm theih hram ka beisei," a ti.

Tennis season thara Grand Slam hmasa ber tur Australian Open hi January 15 aṭanga khelh ṭan tur a ni a, Grand Slam vawi thum champion tawh Murray hi a inlan thei ngei dawn em tih a la chiang lo.

Wimbledon hnua tournament la khel lo Murray hian training chu a nei thei a, mahse inelna hmachhawn turin a la inpeih thei lo. November thla khan Roger Federer nen exihibition match an khel a, Zirtawpni khan Roberto Bautista Agut nen Abu Dhabi-ah an inkhel bawk; beiseina sang tak a neih laiin tunkara khelh tur Brisbane International-ah erawh a inlan thei leh dawn ta lo a ni.