Premier League: Engin nge min hmuak?

June 17-ah Premier League khelh a ni leh dawn ta a, fans tam takin khawvela league ngaihven hlawh bera chhal ngam hi en chakin an awm hle hle thei tawh lo. 

Liverpool chu Premier League champion chiang tawh anga sawi theih an ni a, hei vang hian English top flight league a ngaihnawm loh phah chuang loh - Champions League leh relegation a la awm tlat!

Champions League hmunruak pali awma pakhat chu Liverpool-in an hnawh khat chiang tawh a, Manchester City, Leicester City, Chelsea, Manchester United, Wolverhampton Wanderers leh Sheffield United ten hmun ruak dang pathum an la beisei. 

Table mawng lamah Brighton & Hove Albion, West Ham, Watford, Bournemouth, Aston Villa leh Norwich City-ten inham tan an la beisei vek a, relegation 'fight' mawlh hi a ngaihnawm dawn. 

"Arpuia lungchhia, Sanghara lunglawm," tih ang maiin Manchester City hremna chu club dang tan lawmna a ni thei. City hian Financial Fair Play dan an bawhchhiat avangin kum hnih atan hrem an tawk a, season hnih chhung European football-a inkhel thei lo tura tih an ni.

City hian hrem an nihna hi an khinglet mek a, an hlawhtlin loh chuan Champions League-a City hmun ruak hi table-a panganain an beisei thei dawn tihna a ni - Manchester United chu table-a pangana ni mek an ni a, mahse Wolves leh Sheffield-in point hnih chauhin an thlau tih hriat tel a ṭha a, Sheffield hian match khatin an khel tlem bawk. 

Pangana hian Champions League khel thei dawn ta se Tottenham Hotspur leh Arsenal tan pawh beisei a la awm thei anga sawi ngam a ni a, anni innghahna erawh 'ta se' tihah hian a innghat ril ber. 

Palina Chelsea hian point 48 chauh an la neih avangin inchhuang thei an la ni lo a, United, Wolves leh Sheffield hian City hremnaa innghah aiin palina nichung ngeia Champions League khelh an duh vek ang. 

League match hnuhnung palia an tlawm vek rah sengin Aston Villa chu 19-naah an tla thla a, season thara Premier League khel zel turin an dinhmun a derthawng hle. Hetihrual hian 15-na Brighton an phak lohna hi point li chauh a ni a, match khatin an khel tlem bawk. 

Villa-in table mawng lam chhuahsan turin chance an nei ṭha tih a chiang a, chutihrualin a mawngphah luahlumtu Norwich City hi an dinhmun a him lo takzet - match 29-ah point 21 chiah an la nei a, Villa hi match khata khel tam zawk chungin point liin an phak lo. 

Match 10-a vawi sarih an tlawm rah sengin Bournemouth chu 18-naah an awm mek a, hetihrual hian manager Eddie Howe hi coach theihna nei sang bik a nih avangin liam mai tur anga Cherries ngaih chu thil harsa tak a ni rih. 

Watford hi 17-na ni mek mah se Nigel Pearson an neih hnuah nasa taka hmasawnin tlawm nei loa kal reng Liverpool meuh 3-0 in an hneh a, Premier League inhamtan beiseina a sang hle. 

Premier League khelh chhunzawm leh theih tur hi season chawlh lailawk a nih hmaa hliam vanga indawmkunte tan chuan chanchin lawmawm a ni ve bawk a, season an mangṭha fel tawha an inngaih laiin vul turin hun an nei leh ta. 

Spurs boss Jose Mourinho chu lawm tur ber zingah a tel ang tih a chiang a, a striker chhuanvawr Harry Kane leh Son Heung-min te chu hliam vanga a chhawr theih loh hnuah a chhawr thei leh tawh dawn.

 

Manchester United midfielder Paul Pogba chuan tun season-ah hliam vangin Red Devils tan match riat chiah a la khel a, tunah erawh a rawn kir leh thei dawn ta - Bruno Fernandes nena an inkawp tur hi United fan-ten an hmu chak ang. 

January hnua inlan leh tawh lo United striker Marcus Rashford pawhin dam lam a pan leh tawh a, a tir lamah erawh a inlan theih a la rinawm chuang lo. Players inhliam ngah Bournemouth pawhin ngai an awh ṭan a, relegation 'battle'-ah hei hian a pui ang tih a chiang. 

Liverpool-in nomawi an chawi piah lamah record thar siam theih an nei nual dawn - Manchester City-in 2017-18 season an champion ṭuma point 100 nei chunga point hmu hnem ber record an siam chu khum theihna hun ṭha an nei. 

Reds hian point 27 hmuh tur la awm aṭangin point 19 chiah City record khum tur hian an mamawh a, he season veka point 19-a sang fal chunga City champion-na record chu an khum thei bawk. 

Premier League top scorer ni tura in um pawh hi ngaihnawm a tling. Leicester striker Jamie Vardy chuan goal 19 khung tawhin hma a hruai mek a, mahse Arsenal striker Pierre-Emerick Aubameyang (17), Liverpool forward Mohamed Salah (16), City goal khung khawl Sergio Aguero (16) leh Southampton-a harh tharna chang Danny Ings (15)-te hian an hlat lo khawp mai. 

Hliam vanga rei tak a chawlh hnuah Harry Kane a lo kir dawn bawk a, goal 11 khung hmantu striker hian top scorer ni turin a rawn 'fight' ve leh thei ang em? Kan hre chho zel dawn e.