Goalkeeper an langsar, chak zawk awm lo

Premier League champion Chelsea chuan Arsenal khelmual Emirates Stadium-ah hun tawp dawna goal an chhuah avangin point hnih an hloh. Nilaini zan inkhelah London club pahnihte 2-2 in an inhnehtawk a, point khat ve ve an insem.

Goal li zet a lut chungin Gunners keeper Petr Cech leh Blues si ban nghaktu Thibaut Courtois te chu player langsar an ni. Team pahnih ten goal khung theihna hun ṭha vawi 33 zet an siam theih avangin Premier League season kal laia match hmuhnawm ber ang hiala chhal theih a ni a, striker manto pahnih Alvaro Morata leh Alexandre Lacazette te erawh an mualpho.

Chelsea hian point thum an hmuh zawh loh avangin league table-ah pathumna an ni leh rih. Match 22 khelh tawhah point 46 hmuin an chungah hian Manchester United (47 points) leh hmahruaitu Manchester City (62) te an awm. Arsenal pawh point 39 neiin parukna an ni mek a, palina Liverpool aiin point ngain an hniam zawk.

Penalty?
Belgium international Courtois-a'n Alexis Sanchez leh Alexandre Lacazette te goal khung tur ṭha taka a dan hnuah, minute 63-naah Jack Wilshere a ball pet dang zo lo. England international midfielder hian kum 2015 May thla hnua a league goal hma ber ni turin angle zim angreng tak aṭangin a thlawh lut.

Arsenal hmahruai hun chhung a rei lo. Minute li hnu lekah Eden Hazard chuan ama penalty hlawhchhuah hmangin an siphurh a sut. Arsenal a zawm hnua penalty vawi 14 a hmachhawn tawh la chhuah vektu Cech-a'n a record duhawm lo a la dah ṭha thei rih chuang lo.

Replay thlir letin Chelsea hian penalty an hmuh danah referee Anthony Taylor duhsakna an dawng tih a lang. Gunners defender Hector Bellerin chuan Hazard-a ball chan lai pet sawn a tumna lamah Blues forward ke a tlawh thawi a, Belgian forward a tluk thiam ve bawk avangin referee-in penalty spot a kawk a, Arsenal lam tan pawm dam har tak tur a ni.

Arsenal manager Arsene Wenger chuan, "Ho lam tak a ni, khatiang a nih chuan khatiang inkhelah chuan penalty vawi 10 pek theih a ni ang," ti hialin referee thutlukna a sawisel.

Chelsea lamin point thum hmuh theihna hun ṭha an nei zui, substitute Davide Zappacosta cross chu tawih zetin defender Marcos Alonso-a'n a kheng lut. Mahse, hun tawp hma hretin Gunners tan Bellerin chuan league match 22 hnua a goal hmasa ber khung lehin point khat a hlawh chhuah pui.

Gunners vanduai
Arsene Wenger-a nauten tun hnai ni 19 chhungin an match rukna an khel a, an chunga awm Chelsea lakah hnehna chan tumin an nawr ngam. Forward Sanchez a vannei tawk lo, a ball petin goal ban pahnih a per ve ve hnuah goalline pawn lamah a chhuak.

Goal khat an neih hnuah Lacazette-a'n khung belh theihna hun nei mah se goal ban hrulah a pet chhuak. French international hi tlarhma lamah ṭangkai viau nachungin Blues keeper chiah a hmachhawn tawh ṭum hnih a hlah avangin club Arsenal striker manto ber a nihna a la hlen tawk loah a ngaih theih.

Arsenal manager Arsene Wenger chuan, "Football match ropui tak a ni. Thuthar thehdarhtu leh social media lamah sawiselna hrang hrang awm mah se a pawimawh ber chu match ṭha taka khelh kha a ni zawk," tiin an khelhchhuah dan chu chhuanawm tham a nih thu a sawi.

Wenger chuan sawi zawmin, "Ni ruk chhungin match thum kan khel a, match kan ngah avangin a awlsam lo hle. Chutih rualin ka nauten an theihna sang tak an lantir thei a, an rilru leh theihna zawng zawng an hlan avangin ka lawm," tiin a sawi.

Kum 68 mi Wenger hian Premier League-ah a naute match 812 a enkawl tawh a, ani aia record nei ṭha an awm lo; an match hnuhnung zawka West Brom nen 1-1 a an inhnehtawk ṭum khan Manchester United manager hlui Sir Alex Ferguson record a khum chiah. Wenger hian league nomawi pathum bakah FA Cup pasarih a chawi pui tawh a, Premier League a nih hnuah club lian paruka an sawi aṭangin Liverpool leh Tottenham Hotspur te erawhin league nomawi an la chawi lo.

Morata a hriam lo
Arsenal lakah mikhual Chelsea lamin goal khung theihna hun ṭha vawi 19 an insiam thei a, heng zinga pahnih chiah goal-ah an chantir thei. Tlarhma lama mal tlattir Alvaro Morata chuan goal a khung lo mai ni loin Gunners keeper Cech nen chiah an inhmachhawn tawh ṭum thum chu a khung lo vek!

Real Madrid striker hlui hian a hun ṭha neih hmasaah goal zawnah a pet thei lo a, defender Rob Holding chu chiang zetin paltlang thei mah se goal bar chungah a thlawh chhuak leh bawk. Spain international striker hian an si phurh sutna hun ṭha a neih pawh Cech bawkin a dan sak leh a ni.

Chelsea tan Hazard chu player pawi­mawh a ni a, Belgian forward hian Arsenal tlarhnung a rum ṭhaih fo a, midfielder Cesc Fabregas nena inkawpin Blues goal nawrna thapui an ni. Mahse, an vanneih loh ṭum a nih bakah Blues keeper hlui Cech khelh ṭhat ni an tawn fuh avangin goal hnih bak an sual chhuak thei bik lo.

Chelsea manager Antonio Conte chuan, "Kan khel ṭha a, chance kan insiam hnem hle bawk chunga hnehna kan chang zo lo kha chu a pawi hle. Team ṭha tak kan hmachhawn a, inhnektawk mai ni loin hnehna chan phu zawk khawpin kan khel chhuak a ni," tiin chak zawk tura a inngaih thu a sawi.

Italian manager chuan Morata chung­chang sawi zawmin, "A vanneih hun a ni lo a ni. Striker chu goal khung turin an pawimawh a, vawiina hun ṭha tam tak a nei chunga a khung lo kha a pawi ka ti hle. Chutih rualin club leh a ṭhiante tana a khelh dan leh a inpekna khan min ti lawm, hmasawnna tur a la nei," a ti.

Hmabak
Arsenal hian FA Cup third round khel turin Pathianni zanah Championship club Nottingham Forest an lenchilh dawn a, Chelsea hian Inrinni zanah Norwich chu Carrow Road-ah an tlawh bawk ang. Gunners leh Blues te hi karleh Nilainiah League Cup semifinal first leg khel turin an intawng zui leh nghal dawn a ni.