Novak Djokovic dinhmun a chiang lo

Novak Djokovic chuan Austra­lian Open a khel thei dawn nge dawl lo fiah nan karleh chhung hian exhibition tournament khelh a tum.

Kum 30 mi Djokovic hi a kiu hliam vangin tun hnai thla ruk chhung a inkhel thei tawh lo a, Abu Dhabi leh Qatar-ah inlan a tum pawh a ṭhulh a ni. Kar leh hian match a khel thei a nih chuan season hmasa laihawl laia khelh Wimbledon hnua a match hmasa ber tur a ni a ni ang.

Grand Slam vawi 12 champion tawh Djokovic hian Australian Open nomawi hi vawi ruk a chawi tawh a, kuminah a champion leh a nih chuan chuh buaitu awm loin hard court inelna liana champion hnem ber a ni dawn.

Tun season chhunga Grand Slam hmasa ber tur Australian Open hi January 15 aṭanga khelh ṭan tur a ni. Melbourne Park-ah hian tun hma lama quarterfinal vawi thum khel tawh world number 22 Kei Nishikori chu a banrek na vangin a inlan thei dawn lo tih a chiang tawh.

Japan tlangval Nishikori hian nikum August thla hnuah tour­nament a la khel leh lo a, tun dinhmunah set nga khel tura a la inpeih loh thu a sawi a ni.

Kum 29 mi Nishikori chuan, "Ka inlan thei lo tur hi a pawi ka ti, ka hliam enkawlna a ṭhain a kaltluang viau. Mahse 100% in ka la inpeih loh avangin ka chawlh rih a ngai," a ti.