FA Cup-ah United khingpui tur Derby

Manchester United chuan zanin dar 1:30 hian Old Trafford-ah Derby County an mikhual dawn. Jose Mourinho hote hian League Cup-ah Championship club Bristol City an hneh tawh lo a, tun ṭumah pawh hian fimkhur a ṭul dawn a ni.

Derby hi Championship-ah pahnihna an ni mek a, season tharah Premier League khelh an tum hle. Rams manager Gary Rowett chuan, "League ang thoin FA Cup hi kan la thu tak a, amaherawhchu Krismas vuakvetah match a tam avangin position ṭhenkhat chuan player kan thlak a ṭul dawn. Chutihrualin starting eleven thlak hlawk erawh kan ti dawn lo," tiin United hneh an tum thu a sawi.

Wales international Joe Ledley chu inhliam vangin inlan theih lo dinhmunah a ding a, United player hlui Tom Lawrence erawh hnung na vangin a club hlui a hmachhawn dawn em tih a chiang lo.

United-in an match hnu­hnung berah Everton an hneh a, Mourinho tan pressure a tlem sawt ang. Portuguese manager hian FA Cup tun season-ah nomawi a lak a tum a nih chuan FA Cup a ngaihthah a thiang tawh lo.

Mourinho hian Sou­thamp­ton nena inhliam Romelu Lukaku bak­ah Zla­tan Ibrahi­movic te a chhawr theih loh avangin Marcus Rashford emaw Anthony Martial te pahnih a bukin a rinawm. French forward Martial hian Ever­ton an hneh ṭumin goal a khung.

Tlarhnung lamah Antonio Va­lencia chu December aṭang tawhin hliam vangin a inlan thei lo a, ani hmunruak hnawh khatu Ashley Young pawh match thum khel thei lo tura hrem a ni. Toffees nen Victor Lindelof a inlan a, Axel Tuanzebe pawh thlan theih a ni ang.