NorthEast club-te hmachhawn tur Chennai City

Tun season I League-ah che ṭha fal tiha sawi tur an la awm loh avangin season tluanin a ngaihnawm chho dawn niin a lang. Zanin hian player 10-a khel chunga Mohun Bagan hnehtu Chennai City-in Shillong Lajong an hmachhawn dawn a, inkhelh hun hi dar 5:30 a ni. Vawiin tlai tlai dar 2:00 hian Neroca leh Indian Arrows te an inkhel bawk ang.

Chennai City hian Lajong zawhah I League club thar Neroca chu an mualah January 9 hian an mikhual ang a, hemi zawh hian January 13-a Aizawl FC hmachhawn turin Mizoramah an rawn zin dawn. Mizo club hian South Indian club an hmachhawn hma hian Mohun Bagan (January 7) chiah an hmachhawn dawn avangin hahdamna hun ṭha an nei thei ang.

Chennai City chu
Tamil coach Soundararajan kaihhruai Chennai City hian tun season-ah bul an ṭan ṭha lo a, foreigner pawh nei lo Indian Arrows lakah 3-0 in an tlawm nghal. Hemi zawh ziah club thar Gokulam Kerala nen inhnehtawkin Minerva Punjab leh Neroca lakah an tlawm zui a, match li aṭangin point khat chiah an hlawh chhuak.

Amaherawhchu, Chennai City hian match hnuhnung pathumah point ruk an hmu a, Churchill Brothers an hneh hnuah an team chhungah inrintawkna a awm. Champion tura rinkai East Bengal lakah 2-1 in chak lo zui mah se Mohun Bagan erawh player 10-a khel chungin 2-1 in an hneh a, tun hnaia talbuai Shillong Lajong tan hmachhawn awlsam tur an ni lo.

South Indian club hian an foreinger-te pui turin an khawtual player an hmang nasa a, captain atan pawh Tamil tlangval Michael Soosairaj an hmang a, nikum lam aiin team boruak pawh ṭha tura ngaih a ni.

Lajong hi...
Shillong Lajong-in Aizawl FC an hneh hnuah Neroca an hneh lo a, Indian Arrows lakah 3-0 a an mualpho zui avangin Chennai City lakah result ṭha an mamawh hle.

Lajong hian December 26 hnuah match an nei leh tawh lo a, an hun awl neih an hmang ṭha a nih chuan Samuel Lalmuanpuia captain-na hnuaia khel team hi team dang daih an ni thei ang.

Bobby Nongbet enkawl Lajong hian match sarih aṭangin point 10 an hmu a, khelh zat inangah Chennai City hian point thum chiaha an phak loh avangin inkhel result hian table-ah nghawng lian tak a nei thei dawn a ni.

Neroca an tlo
I League club thar Neroca-in match ruk an khelh tawh aṭangin point 11 an hmu tawh a, Manipur club hian an season khatnaah Minerva Punjab chiah an la hneh lo a, Kolkata club lian pahnih East Bengal leh Mohun Bagan an draw thei bawk.

Neroca hian rawlthar rual awm khawmna Indian Arrows lakah fiahna an hmachhawn dawn. Portuguese coach Luis Norton de Matos-a'n Manipuri player a ngah avangin Neroca an tlawh hunah an inthlahrung bik lo tawp ang.