Zanin dar 1:25-ah Merseyside Derby

FA Cup third round chu zanin aṭangin khelh ṭan a ni dawn a, Liverpool-in Anfield-ah an hmelma kumhlun Everton an mikhual dawn.

Kumin inelna hi vawi 137-na a ni a, FA Cup hi khawvela football inelna upa ber a ni. Tun ṭumah hian team tel zawng zawng hi 737 an ni a, main competition-a an chhiar chinah erawh team 124 chiah an awm. Third Round aṭangin Premier League leh Championship club te an inlan ṭan a, team 64 an la dam–champion lai chu Arsenal an ni.

Merseyside Derby
Liverpool leh Everton inkhel hi Merseyside Derby tih a ni a, tun hma chuan chhungkuaah pawh club pahnih ṭan an inpawlh ṭhin avangin 'friendly derby' tiha sawi ṭhin a ni.

Amaherawhchu, kum 1980 bawr chho aṭangin khelmual chhung leh pawn lamah boruak a awm chho a, Premier League ṭan a nih aṭang chuan an inhal tawh hle. Tun hnaiah chuan derby inkhel hmuhnawm ber zinga mi a ni.

Reds an ṭha hret
FA Cup-ah Liverpool hian vawi 24 Everton hi an hmachhawn tawh a, Reds hian vawi 10 hnehna changin vawi ruk an inhnehtawk a, vawi sarih an chak lo.

He inelnaa an intawn hnuhnun ber hcu 2012 FA Cup semifinal a ni a, Wembley Stadium-ah Reds-in Luis Suarez leh Andy Carroll te goal hmangin hnehna an chang.

Liverpool hian January 2011-a Manchester United an hneh loh hnuah third round an la paltlang vek a, Everton erawhin season hnuhnung pathumah vawi hnih an chak lo nghal a, an hneh loh hi Premier League club an ni.

Tun season Premier League-ah pawh Reds-in match 22-ah point 44 an hmu a, Everton erawhin point 27 chauh an hmu thung. Amaherawhchu Sam Allardyce hnuaiah Toffees-in harhtharna an chang chho a, Reds elpha tur squad an neih bawk avangin Merseyside Derby hi a hmuhnawm khawp ang.

Engtin zel?
Reds hian December 10 khan Everton an mikhual a, minute 42-naah Mohamed Salah hmangin hma an hruai a, inkhel an thunun vek bawk. Jurgen Klopp hote hian ball possession pawh 79% zet nei pha mah se minute 77-naa Wayne Rooney penalty hmangin Toffees-in an sut a, 1-1 in inkhel a tawp.

Big Sam chuan, "Kan tum ber chu kan khingpuite tih beidawn kha kan tum hmasak ber a ni," tiin inkhelh banah a sawi a, zaninah pawh Everton hna hmasa tur chu Liverpool tlarhma dan a ni.

Everton tana thu lawmawm a awm a, Reds goal nawr tinatu Salah leh Philippe Coutinho te chuan hliam vangin Burnley an hmachhawn tawh lo a, zaninah pawh an la beiseiawm loh. Brazilian midfielder Coutinho hi malpui na anga sawi ni mah se Barcelona nen sawi zawm ṭhat leh a nih tak avangin inkhel thei lo tur khawpin a na em tih hi zawhna a awm thei a ni.

Reds chanchin dang
Salah hian league-ah goal 17 khungin top scorer a ni mek a, inelna hrang hrangah goal 23 a khung tawh. Egyptian midfielder hi BBC African Footballer of the Year leh Arab Player of the Year atan thlan a ni tawh a, tunah hian a khelhpui Sadio Mane, Senegal leh Pierre-Emerick Aubameyang, Gabon te nen African Footballer of the Year nominee-ah telh an ni.

Award Ceremony hi nizan khan Accra, Ghana-ah neih a ni a, Merseyside Derby awm mah se Liverpool-in Salah leh Mane te kal an phalsak. Reds boss Jurgen Klopp chuan, "Hun bik a ni a, an kal kha an tan a ṭha a ni. Keini hotel-a kan mut laiin thlawhtheihnaah an lo mu ve mai dawn a, kan inkhel turah nghawng a nei lo ang," tiin a sawi.

Liverpool ṭantute hmuh châk tur chu an defender thar Virgil van Dijk a ni a, pound maktaduai 75 man Dutch defender hi chhawr theih a ni tawh. Amaherawhchu, Reds boss Klopp-a'n a hmanhmawh loh tur thu a sawi.

German manager Klopp chuan, "Amah chuan khelh a duh tawh a, keini erawh kan hmanhmawh dawn lo. Centre back position hi thui takin khelhpuite chungah an innghat a, pre season hi chutiang zirna hun ṭha tak a ni. Thui tak kan thlir avangin a match hmasa ber hi thil pawimawh ber a ni lo, Merseyside zawh chuan hun thawl kan ngah zawk ang," tiin a sawi a, khawvel defender manto ber a inlan a rinawm loh.