Santosh Trophy Qualifying Round Mizoram aiawh tur player 20 a hriat ta
National Football Championship for Santosh Trophy North East Zone qualifying round chu January 8-13, 2018 chhung hian Lammualah khelh tur a ni a, inelna thleng turin Mizoram Football Association an inpeih tawh.
Mizoram team hi MPL6-a Chhinga Veng champion puitu coach Lalsangzuala Hmar-in a enkawl dawn a, nimin khan inelna hmachhawn tur player 20 an puang
Mizoram hi Group A-ah Assam leh Arunachal Pradesh te nen an awm a, Group B-ah Meghalaya, Manipur leh Tripura te an awm bawk. Group khat aṭangin pakhat ve ve final round khel turin an tling ang. Mizoram hian an January 10, Nilaini hian match hmasa berah Arunachal Pradesh an hmachhawn ang.
Mizoram aiawh khel turte hi tualchhung football aṭanga en a ni a, MPL6-a an khelh dan chu tehfung lian ber a ni. I League-a inlan player-te bakah All India Police Meet khel tura inbuatsaih Mizoram Police player-te chu thlan zingah an tel lo a, probables squad-ah player 30 an thlan zet hnuin final squad atan player 20 an thlang chhuak.
Lalsangzuala Hmar chuan, "Player ṭha vek an ni a, chuvangin final squad tur thlan pawh hi a harsa hle," tiin a sawi a, final squad-ah hian I Day Football leh MFA Super Cup top scorer Malsawmfela telh a ni lo.
Zawhna chhangin Sanga chuan, "Sawmfela hi a nu damlohna vangin kar khat chhung training a nei thei lo a, a tel thei lo tur hi a pawi khawp mai," a ti.
Mizoram team hian December thlaah training nei ṭan tawhin January 2 aṭangin inpuahchahna an chhunzawm leh tawh a, an hun neih ang ṭha takin an hmang. Sanga chuan, "Club angin training-na hun ṭha kan ngah tawk lo chungin theihtawp kan chhuah a, kan structure pawh kan bel thawkhat hle. Amaherawhchu, kan club hrang hrang aṭanga kalkhawm kan nih avangin duhthusam chu a la ni thei lo. Mizoram tan theihtawp kan chhuah ang," tiin Vanglaini a hrilh.
