African player ṭha ber Salah

Liverpool forward Mohamed Salah chu 2017 Confederation of African Football Player of the Year atan thlan a ni. He chawi­mawina dawng tur hian Reds tana a khelh pui Senegal winger Sadio Mane chu a khum a, Borussia Dortmund leh Gabon striker Pierre-Emerick Aubameyang chu pathumna a ni.

Kum 25 mi Salah hian tun season Premier League-ah goal 17 a khung tawh a, club tana a chet ṭhat ang bawkin an ram tan player ṭangkai a ni a, Egypt chu FIFA World Cup khel tura a hruai tlin bakah Africa Cup of Nations final a luh pui bawk.

Chawimawina hi Ningani zan khan Ghana khawpui Accra-ah hlan a ni a, he hunah hian Reds duo Salah leh Mane te an inlan. Nizan khan FA Cup third round-ah Liverpool hian Everton an hmachhawn.

Nikum December thlaa BBC African Footballer of the Year chawimawina dawng tawhtu Salah chuan, "Ka tan chuan nikum kha kum hlu bik a ni a, he chawimawina hi Africa leh Egypt naupangte tan ka hlan," a ti a, an duhthusam leh beiseina chhawm nung zel turin a hrilh bawk.