Everton leh Besiktas inrem

Everton manager Sam Allardyce chuan striker Cenk Tosun lalut turin Besiktas nen inremna an neih tawh thu a sawi. Turkish club aṭanga Tosun la chhuak tur hian pound maktaduai 27 vel an sen a ngai dawn.

Premier League club leh Besiktas president Fikret Orman te hian Tosun lakah inbiakna an nei fel tawh a, tunah chuan mimal thil chiah buaipui tur a awm tawh, he thu i chhiar meuh chuan an lalut fel tawh thei bawk.

Kum 26 mi Cenk Tosun hian season kal laiah a club tan player pawimawh a ni, palina a nih pui mek. A club hi Champions League last 16 a hruai thleng bawk, an ram Turkey tan match 24 a khelhah goal riat a khung tawh. Ronald Koeman thlaktu Allardyce tan a player lakluh hmasa ber tur a ni.

Everton hian nikum nipui trasfer lai khan an striker chhuanvawr Romelu Lukaku chu Manchester United lakah an chân a, a hmun ruak luah turin Wayne Rooney ko kir mah se England international hlui hi a vanglai a pel tawh a, striker puitu atana hman a nih tawh avangin rinrawl tur dang an mamawh.

Everton manager Big Sam chuan,"League bakah Champions League-ah goal a khung thei a, a rilru put hmang hi Premier League khel turin a ṭha tawk," tiin a player thar lakah beiseina a nei sang hle.