Saina hmachhawn turin Marin a inpeih

Khawpui hrang hranga khelh kual Premier Badminton League chu tun kar tawp chhung hian Chennai-ah khelh a ni dawn a, Pathianni zanah Hyderabad Hunters leh Awadhe Warriors an intawng dawn.

Hyderabad Hunters captain Carolina Marin chuan Awadhe Warriors star Saina Nehwal hmachhawn tur a inpeih thu a sawi a, hmeichhe singles player pahnihte hi an intawng a nih chuan badminton ngainatute tan en hmaih chi a ni lo ang.

World number 1 hlui Marin chuan, "Training kan nei ṭha a, inbuatsaihna kan neih ṭhat avangin inrintawkna pawh kan nei. Kan tum hmasa chu semifinal luh phawt a ni a, round khelh hmabak pahnihah hian a ṭha thei ang bera khelh kan tum ang," tiin a sawi.

Hyderabad Hunters hian match thum an khelhah point riat hmuin table-ah parukna an ni mek a, an chunga awm Mumbai Rockets (10 points) leh Delhi Dashers (11 points) te aiin match khatin an khel tlem zawk a, semifinal lut turin beiseina an la nei.

Olympic champion Marin chuan sawi zawmin, "Season hnih a zawnin Hunters tan ka khel ta a, he team hian hlut bikna riauna a nei. Player-te kan inlungrualin kan thawhhona a ṭha em em a, player tupawh hmachhawn thei turin kan inpeih tawh a ni," tiin a sawi.

PBL-ah hian team pariat an inlan a, an inkhelh kual hnuah a sang paliin knock out round an lut ang. Match tinah hian vawi nga an inkhel a, regular match bikah a chak zawkin point khat hmuin a chak lo zawk tan point a awm lo thung. Trump Match bikah a chak zawkin point hnih an hmuh laiin a chak lo zawk chu point khat paih sak (-1) an ni thung.