Real chak niah Barca chak zo lo

Real Madrid chuan penalty vawi hnih hmangin second division club Numancia chu 3-0 in an hneh a, La Liga champion hi Copa del Rey quarterfinal lut turin an dinhmun a ṭha tawh hle. Barcelona erawhin an player ṭha chawlhtir chungin an mikhualna ramah Celta Vigo chu 1-1 in an inhnehtawk pui thung.

Real chak chiang

Ningani zan Copa del Rey last 16 first leg inkhelah Real Madrid tan a hun laia player manto ber Gareth Bale chu player langsar a ni. Tottenham winger hlui hian a dam chiang tawh tih lantir nan chawlhlawk hmain penalty aṭangin goal hmahruai a khung. Welsh international hian September thla hnuah goal a khung leh chiah a, tun season chhunga a goal ngana chiah a ni bawk.

Spain second division-a pangana ni lai Numancia-in first half chhungin goal khat bak an chhuah belh lo a, minute 60-naah Pape Maly Diamanka chu hnawhchhuah niin, hemi hnuah Isco chuan penalty aṭanga an goal hnihna khungin hun tawp hma deuhin Borja Mayoral-a'n an goal thumna a khung zui leh bawk a ni.

Real Madrid manager Zine­dine Zidane chuan, "Si thum faia hnehna chan hi thil awlsam a ni lo, an player pakhat hnawhchhuah a nih hnuah pawh an ṭang thei hle. Player kim loa an khelh hnuah khan an khel ṭha zawk sawtin ka hria, football hi chu hriatthiam a harsa a, hetiang thil hi a thlen chang a awm. Mahse, a tawpah chuan kan mamawh zat goal kan khung thei a ni," tiin a sawi.

Kum 28 mi Bale-a'n season hmasa aṭangin hliam a nei fo a, tun hnaiah a hliam dam hnua a vawi khat nan inkhel bul a ṭan ve leh chiah. Bale chungchang sawiin Zidane chuan, "Darkar khat chhung ṭha takin a khel thei, kha kha kan ruahman ang a ni. Kan squad-ah player ṭha an tam a, khelhna hmun chang tur chuan an thawhrim vek a ngai," a ti.

Dembele inkhel ta
Barcelona player manto ber Ousmane Dembele chu a malpui hliam a dam tawh a, Celta Vigo lakah bench aṭanga luhtir niin danglamna thlentu erawh a ni lo.

Barca coach Ernesto Val­verde-a'n an thiampuipa Lionel Messi, captain Andres Iniesta, Luis Suarez leh centre back Samuel Umtiti te squad-ah a telh lo a, goalkeeper Ter Stegen leh midfielder Ivan Rakitic te pawh bench-ah dah an ni bawk.

Catalan club tan hian B team striker Jose Arnaiz chuan minute 15-naah goal hmahruai khungin, chawlhlawk hma deuhin Pione Sisto-a'n an siphurh a sut - goal dang a lut tawh lo. Barcelona tan Sergio Busquets leh Sergi Roberto ten an hun ṭha neihah woodwork an tih per a, an vannei tawk lo.

Barca coach Valverde chuan, "Dembele kha thla li deuh­thaw a chawlh hnuah a rawn kir chauh a ni a, minute 90 khel tur chuan a la inpeih lo deuh a ni. Khelmual chhunga a awm chhung khan a ṭangkai a, kan beisei ang ngeiin khingpuite chhaih mangangtu a la nih chhunzawm ngei ka beisei," tiin a sawi.

Barcelona hian quarterfinal lut tur chuan goal an khung ngei a ngai tawh dawn, Janaury 11 hian second leg klhelh tur a ni ang. An inkhelh lehna tur hi Nou Camp a nih avangin Barca hi rinkai zawk an la ni ang.