Swiss tan Federer a rintlak

Roger Federer-a'n season bul ṭan nan an ram Switzerland tan Hopman Cup a khel a, ram leh ram tennis team hmanga inelnaah hian final a hruai thleng.

Hopman Cup hi Australia khawtlang lam Perth-ah khelh a ni a, Ningani khan Switzerland hian US lakah 3-0 a hnehna changin semifinal an lut. He inkhelah hian world number 2 Federer hian world number 10 Jack Sock lakah 7-6 (7/5), 7-5 in hnehna a chang a ni.

Kum 36 mi Federer hian season hmasa pawh khan bulṭan nan Hopman Cup title hi a la a, season duhawm hmang chhunzawmin Grand Slam nomawi pahnih a chawi zui bawk.

Grand Slam vawi 19 champion tawh Federer chuan, "Season hmasa kha chuan world number 17 ni chungin bul ka ṭan a, kumin nen chuan khaikhin chi a ni lo ang. Tun ṭumah khan match ṭha takin kan khel thei a, kei leh Sock tan pawh season thar beiseina sang tak a awm thei turah ka ngai," tiin a sawi.

Kumin Hopman Cup hi a vawi 29-na a ni a, United States, Germany, Bel­gium, Russia, Swiss, Japan, Canada leh Australia te an inlan. Group pahnihah ṭhen hran niin Group B aṭangin Switzerland chuan final an lut tawh a, Group A lamah Germany chu hmahruaitu niin Belgium nen final lut thei an la ni.