FA Cup-ah Man City fiahna

Manchester City-in tun season-ah nomawi pali an la chawi thei a, zanin dar 8:30 hian FA Cup third round-ah Burnley an mikhual ang. Pep Guardiola hote hi chak zawka tura ngaih ni mah se knockout match hmasa bera Premier League club an hmachhawn hi an vanduaiah a ngaih theih.

'Quadruple'
Inelna palia champion hi 'quadruple' tih a ni a, City hian Premier League bakah Champions League, FA Cup leh League Cup-ah champion turin beiseina an la nei vek. League-ah City hian match 22 khelh tawh aṭangin point 62 an hmu a, anmahni hnaih bertu Manchester United aiin point 15 in an sang zawk.

Champions League-ah City hian knockout stage thleng tawhin FC Basel nen Last 16-ah an inhmachhawn dawn a, League Cup-ah semifinal thleng tawh bawkin Championship club Bristol City nen final khel tur double leg-in an zawng dawn. Pep Guardiola hote tan season khata nomawi pali chawi hi thil theih a la ni a, Spanish manager erawhin inelna palia champion 'quadruple' hi a beiseiawm loh thu a sawi thung.

Amaherawhchu, City hian sum an sen nasat avangin an hmaa nomawi awm tawh phawt chu lak an tum dawn a, hei tak hi Pep Guardiola an lakluh chhan pawh a ni. FA Cup hi inelna ngaihhlut a ni a, Pep-a hnuaia nomawi la chawi lo City tan a hlu lehzual a, Burnley lakah pawh player ṭha an inlan ang.

Burnley faktu Pep
Man City manager Pep Guardiola chuan, "Kan khelh dan hmang chauh hi football khelh dan a awm ka ti lo. Helai hmuna ka rawn kal chhan chu chak tur leh mipui tihlim turin a ni. Chutihrualin Tottenham khelh dan te hi ka lawm a, Antonio Conte-a'n khelh dan hmang bik neiin Chelsea a kaihruai a. Chutiang tho chuang Burnley khelh danah hian duh lai tam tak ka nei a ni," tiin a khingpui tur Burnley a fak.

Amaherawhchu Pep hian Clarets chauh fak loin a khing­puite ṭhatna lai a hmuhsak. Spanish manager Pep chuan, "Ka khingpui turte ka zirchian hian an ṭhatna lai ka hmuhsak ṭhin. Premier League club zawng zawngin ṭhatna lai an nei vek a, chutiang thoin Bundesliga leh La Liga a danglam lo. An ṭhatna lai hriat a, chumi hneh tur hriat kha manager ka nihna chhan a ni," tiin a sawi.

City hian tun season-ah Burnley hi league-ah 3-0 in an hneh tawh a, hemi ṭuma goal khungtu Sergio Aguero, Leroy Sane leh Nicolas Otamendi te chu Clarets hmachhawn turin an dam vek.

Engtin zel?
Man City hian December thaalh match sarih an khel a, January thlaah match sarih tal an khel dawn. Champions League, FA Cup leh League Cup final an thleng a nih chuan tun season-ah match 63 an khel tling dawn tihna a ni. Spanish manager Pep chuan Watford 3-1 a an hneh zawhah Krismas leh kum thar laia inkhel tam lutuk chu player-in an tuar thu a sawi.

Hetihlai hian City player-te erawh inkhel turin an inpeih hle. Brazilian midfielder Fernandinho chuan, "Kum thar ni kha ka chenna inah ka nupui fanaute nen kan hmang a, inkhel turin ka inpeih a ni. Pep-a thutlukna a pawimawh a, koh an nih phawt chuan player zawng zawngin khelh kan duh vek," tiin a sawi a, Brazilian goalkeeper Ederson pawhin a teammate hi a ṭawmpui thu a sawi ve bawk.

Pep hian player ṭha vek thlang duh pawh ni se hliam vangin Gabriel Jesus leh Kyle Walker te chu thlan theihin an awm lo a, David Silva pawh a fapa Mateo damlohna vangin match engemaw zat a inlan tawh lo bawk. City khingpui tur Burnley pawh match khelh tam vanga buai tho an ni.

Clarets boss Sean Dyche chuan, "Duh thlan tur chuang ka nei lo. Player ṭhahnem tak ka awltir a ṭul a, player kan thlak kual a ngai a ni. Chak turin kan thawkrim a, chutihrualin player-te hi mihring ve tho an ni," tiin player a siksawi tur thu a sawi ve bawk.