FA-in Wenger insawifiah turin ti

England-a football thuneitu sang ber Football Association (FA) chuan Arsenal manager Arsene Wenger chu tun hnaia refe­ree chungchanga a thusawi chu sawifiah turin an ti.

Arsenal hian hun tawp dawna penalty an chawi avangin West Brom nen 1-1 in an inhnehtawk a, an match hnuhnung zawka Premier League champion an hmachhawn ṭum pawhin sawi hlawh takin penalty an chawi leh bawk.

French manager Wenger hian West Brom an hmachhawn ṭuma referee Mike Dean a sawisel vangin nizan dar 11:30 thleng kha insawifiahna hun a nei a, Blues nen an inhnehtawk chungchanga referee a sawiselna sawifiah nan Janaury 9 zan thleng hun a nei thung.

Kum 68 mi Wenger hian tun season chhungin Chel­sea an hmachhawn hma pawh khan Stoke, Wat­ford, Manchester City leh West Brom lakah referee thutlukna fuh lo an tuar tawh thu a sawi a, FA lam­in a thusawi hi an ngai­mawh avangin buaina a hma­chhawn dawn niin a lang.

Premier League lama beisei phak lo Arsenal hian Pathianni zan dar 9:30-ah FA Cup third round an khel zui dawn a, Championship club Nottingham Forest an lenchilh ang. Nottingham hi league table-ah 14-na nilai an ni a, an dinhmun thlir chuan champion lai Gunners hi round sang zawk lut tura rinkai an ni.