Euro 2020 Semifinal kan nghak chhuak ta Zanin dar 12:30 : Italy vs Spain

Europe football ram ropui pahnih Italy leh Spain ten zanin dar 12:30 hian khawvela stadium ropui ber zinga mi Wembley Stadium-ah European Championship 2020 final khel tur zawk an zawng dawn.

Roberto Mancini enkawl Italy hi tun inelnaa team ṭha ber ang hiala sawi theih an ni a, Luis Enrique enkawl Spain hi ram inelnaa possession football khel ngam an ni thung.

Wembley Stadium
Euro 2020 semifinal leh final hi Wembley Stadium-ah khelh a ni dawn a, entu 60,000 an awm thei tawh dawn. Khelmual an hman rim dawn avangin UEFA lamin training an remti lo. Semifinal khel tur ram pahnih hi Euro thlengtu zinga mi an ni a, group match zawng zawng mahni mualah an khel ve ve.

Italy vanneihna erawh last 16-a Austria 2-1 an hneh ṭumin Wembley Stadium-ah an khel a, tawnhriat ṭha tak a ni thei ang. Chutihrualin Roberto Mancini hote hi an khel ṭha tawk lo a, minute 90 chhungin Austria lakah goal an khung thei lo.

Spain erawh Seville-a match thum an khelh hnuah Copenhagen leh St Petersburg-ah an zin. Tun ṭum inelnaah Wembley Stadium-ah la khel lo mah se Luis Enrique-a'n Spain a enkawl tirha an match hmasa ber an khelhna hmun a ni.

October 2018 khan Enrique enkawl Spain-in England 2-1 in an hneh a, hemi ṭuma bul ṭantu zingah David De Gea, Sergio Busquets leh Thiago Alcantara te chiah an awm tawh a, captain Busquets chiahin bul a ṭan pha tawh a ni.

Pablo Sarabia inhliam vanga bul ṭan tura beisei Dani Olmo chuan, "Kan khelhna tur hi Wembley Stadium a ni a, Wembley hlutna phawk chhuak tur khawpa kan khelh ṭhat a ṭul a ni," tiin a sawi.

Goal khung thei
Spain hian tun inelnaah goal 12 an khung tawh a, an khung tam ber. La Roja hnaih bertu chu an khingpui Italy hi an ni a, goal 11 an khung tawh. Attacking football khel pahnih inhmachhawn tur an nih avangin an inkhel tur hi en a châkawm takzet.

Spain leh Italy te attacking football khelh dan hi a inan loh avangin semifinal hmasa ber hi en a châkawm lehzual a, an thiamna thlirin final-ah inhmachhawn zawk se ti tu an tam khawp ang. La Roja hian an inkhelh tawhah 67.2% ball an chang thei a, an khingpui tur Italy hi 55.8% ball chang thei an ni thung.

La Roja hian goal an khung tam chungin striker goal khung thei an mamawh a, Alvaro Morata-a'n goal hnih khung mah se a hlah tam avangin duh khawp lohna a awm. Juventus striker thachhang dawltu Gerard Moreno-a'n goal a la khung lo. A êng zawnga thlir erawh chuan Spain hi mi pakhata innghat loin kil tin aṭangin goal an khung tihna a ni.

Spain ang thoin Italy player zingah goal hnih aia tam khung an la awm lo a, an hmatawnga hming langsar ber Ciro Immobile-a'n knockout stage chinah goal a la khung lo a, Domenico Berardi leh Andrea Belotti ten goal an la khung lo hrim hrim.

Chutihrualin Lorenzo Insigne a hmuhnawm a, Federico Chiesa leh Matteo Pessina te an kawl bawk avangin tlarhma lam player-te sawi chhiat a rem lo. Spain aiin Azzuri tlarhma an ṭha rual zawkah a ngaih theih.

Goal venhim hi
Spain hian group stage-ah goal khat lek an chhuah a, amaherawhchu knockout stage-ah goal li an chhuah avangin Luis Enrique-a'n Azzuri lakah tlarhnung ṭha zawka a rem phui a pawimawh ang. La Roja defender-te cross ball-ah an duap leh ṭhin a, nawr beh an dawl loh avangin offside trap a sang ṭhin hle.

Enrique hoten ball an chang tam a, hei hi an goal venhim dan pakhat a ni. Croatia nen an inkhelh ṭumin goal khung ṭha mah se tlarhnung phui loh avangin extra time khelh a ṭul phah. Quarterfinal-a Switzerland nen an inkhelh ṭumin goal khung an harsat a, an tlarhnung a nghing nasa bawk.

Italy erawh goal venhim kawngah pawh duhthusam tia sawi theih an ni a, tun ṭum inelnaah goal hnih chauh la chhuahin goal pakhat zawk hi penalty aṭanga an chhuah a ni. Chutihrualin Belgium nen an inkhelh ṭumin left wing back Leonardo Spinazzola a inhliam a, Roma defender hi tun inelnaah a inlan dawn tawh loh avangin a hmunruak zau tak hi hnawh khah a harsa ang.

Spinazzola hi wing back ni mah se goal nawr kawngah a ṭangkai em avangin tlarhnung lam ai mahin tlarhma lamah a awm lo tur hi a pawi thei a, Chelsea defender Emerson tan chona lian tak hmachhawn tur a awm dawn a ni.

Euro 2012 final Rematch
Kum kua liam taah khan Spain leh Italy hi Euro 2012 final-ah an inhmachhawn a, La Roja hi 4-0 in an chak. Kyiv, Ukraine-a final khelhah hian Spain an chak chiang a, Azzuri hian tun ṭumah thlen nawn tir an tum lo ang.

Euro 2012 final-ah khan tun ṭuma Italy innghahna Leonardo Bonucci leh Giorgio Chiellini te hi player pawimawh an ni tawh a, Chiellini hi left back-ah awmin malpui hliam vangin minute 21 lekah lakchhuah a ni. Azzuri squad-ah hian Salvatore Sirigu a awm bawk a, kum 34 mi keeper hi bench-ah a awm thung.

Spain-ah hian tun ṭuma captain Sergio Busquets hian midfield-ah hmun pawimawh a chang tawh a, vice captain Jordi Alba hi final-a goal khungtu zinga mi a ni. Euro 2020 semifinal-ah hian Euro 2012 final-a inlan tawh player pali Bonucci, Chiellini, Busquets leh Alba te an luh nawn vek a rinawm a, keeper Sirigu erawh bench-ah tho a awm leh ang.

Luis Enrique-a din Spain team
Spain-in Luis Aragones hoin Euro 2008 nomawi an chawi a, Vicente del Bosque hoin World Cup 2010 bakah Euro 2012-ah an champion. La Roja-in ram inelna football an thunun a, amaherawhchu team ropui pawhin chuai hun an nei.

World Cup 2014-ah group stage-ah an tla a, an match hmasa berah Netherlands lakah 5-1 ngawtin an tlawm. Euro 2016 leh World Cup 2018-ah Spain-in last 16 bak an thleng lo. Spain-in indin ṭha turin coach ṭha an mamawh a, July 9, 2018-ah hlawhtling taka Barcelona enkawl tawhtu Luis Enrique an lalut a, match hmasa berah England chu Wembley Stadium-ah 2-1 in a hneh nghal.

Enrique hi a fanu enkawl a ṭul avangin chawlh a la a, hemi chhung hian a assistant coach Robert Moreno-a'n an ram team hi a enkawl. Enrique leh Moreno hi kum ruk zet inzui tawh an ni a, ṭhian ṭha tak ni mah se Enrique let leh hnuah Moreno hian amah a enkawl zui a duh avangin Barca manager hlui hi a assistant aṭangin a ban.

Kum 51 mi Enrique hi manager rorum tak a ni a, thutlukna huaisen a siam zingah Euro 2020 squad-a Real Madrid player a tel lo leh player 26 koh theih aṭanga 24 chauh a koh te chu a tel ngei ang. Chutihrualin chetsual ching David de Gea aiah first keeper turin player naupang zawk Unai Simon a thlang bawk.

Amaherawhchu Enrique hian awmze nei leh tum mumal tak neiin team a enkawl a, player ṭha bik Xavi leh Andres Iniesta te a neih tawh loh avangin a hna hi a hautak lehzual. Chutihrualin a player thlan danah a game duh dan 'possession football' khel tur a ngai pawimawh tih a chiang.

Enrique hian Covid-19 vangin Euro 2020 inkhelh ṭan tirh lamah harsatna a tawk a, tunah erawh hri leng vanga buaina an mangṭha thei tawh. Spain team-ah Barcelona player Sergio Busquets leh Pedri ten hmun pawimawh an chang a, Jordi Alba pawh a la ṭangkai reng a, Manchester City-a Pep Guardiola hnuaia khel Aymeric Laporte a pawimawh bawk.

Hriat tel tur erawh Spain hi Covid-19 vanga buai an nih rualin hri leng vanneihpuitu tiin an sawi theih a, an player ṭangkai ṭhenkhat hi kum 2019-a Euro Under 19 champion team-a mi kha an ni. Goalkeeper Unai Simon hi squad-ah a tel a, final-a Germany 2-1 an hneh ṭumin Dani Olmo leh Fabian ten goal an khung.

Fabian hi 2019 Euro Under 21-ah best player-ah thlan a ni a, semifinal an thlen theih nana Switzerland an hneh ṭuma penalty aṭanga chakna goal khungtu Mikel Oyarzabal pawh Under 21 team-ah hian player pawimawh a ni.

Enrique hian kum upa zawt player Cesar Azpilicueta leh kum naupang zawk player te awmze nei takin a rem khawm a, Euro 2020-ah bul ṭan ṭha lo mah se tunah chuan team ṭha tak a din a, Italy lakah phuba lakna remchang a nei.

World Cup 1994-ah khan Italy player Mauro Tassotti chuan tuna Spain coach Enrique hi a nghawk a, Spanish midfielder hi a hnar ruh a tliak. Tunlai angin VAR a la awm loh avangin Tassotti hi hnawhchhuah ni lo mah se FIFA-in a en let hnuah match riat ngawt inkhel thei lo turin a hrem.

Italy hi extra time-ah 2-1 in an chak a, a pawi tur zawng zawng a pawi zo tawh. Spain physiotherapist Senen Cortegoso chuan Enrique hian Tassotti hi thah hial a duh thu a sawi. Chutihrualin kum 2011 khan Enrique hian Roma a enkawl laiin hetihlaia AC Milan assistant coach Tassotti hi a chibai a, kum 17 a liam tawh avangin thinurna a neih tawh loh thu a sawi.

Amaherawhchu Spain coach Enrique hian Euro nomawi chawi turin Italy hneh a duh dawn a, Tassotti nena boruak an neih tawh avangin a châk sawt bawk ang.

Belgium lakah goal hnih kan khung a, goal tam zawk khung thei tur kan ni. Chak phu zawk kan ni a, kan hmabak chu Spain. Kan thlen san poh leh a harsa tial tial.
- Roberto Mancini, Italy coach

Jorginho hi Italy tan player pawimawh a ni a, inkhel kaihruaitu ber a ni. Final thlen kan duh a nih chuan kan ball kan chan tlemtir a ṭul dawn a ni.
- Cesar Azpilicueta, Spain defender

Italy nen kan inkhelh tur atan kan theih ang tawka ṭhain kan inzir.
- Luis Enrique, Spain coach

Italy nge chak zawk dawn Spain?
Euro 2020 semifinal thleng turin Spain aiin Italy an khel ṭha zawk a, champion rinkai zinga mi Belgium hnehtu Azzuri hi chak tura ringtu pawh an tam zawk. Amaherawhchu football-ah chuan engpawh thleng thei a ni a, zanina Wembley Stadium-a khel ṭha zawk an chak ang.

Jorginho vs Busquets
Italy game khaipa tiha sawi theih chu Jorginho a ni a, Champions League-a Chelsea champion puitu midfielder hi Roberto Mancini-a'n a hmang thiam takzet. Manuel Locatelli chuan, "Jorginho a awm hi chuan kan khel ṭha sawt zel," tiin ram tana a khelhpui hi a fak a, Spain pawhin Jorginho hi ball chan tlemtir an tum ang.

Pep Guardiola chher hriam Sergio Busquets hi kum 32 mi a ni tawh a, Spain game-ah chuan a la ṭangkai hle. Barcelona midfielder hi ball pass thiam bik a ni a, chutihrualin a kum a upat tawh avangin kum naupang zawk Pedri puihna a mamawh tel a rinawm.

Chiellini & Bonucci vs Álvaro Morata
Juventus defender Giorgio Chiellini leh Leonardo Bonucci te hun rei tak an inkawp tawh a, ram inelnaah chuan inkawp fuh ber zinga mi an ni. Chutihrualin Juve tana an khelhpui Álvaro Morata lakah chona a hmachhawn dawn.

Italian tlarhnung hian Belgium striker chhuanvawr Romelu Lukaku an dah ṭha tawh a, amaherawhchu Morata erawh a khelh dan a dang dawn avangin Azzuri tlarhnung hi chungnung nghal tura dah a rem lo.

Donnarumma vs Simón
Euro 2020-ah Gianluigi Donnarumma leh Unai Simón te an khel ṭha dun hle. Donnarumma hian chetsual a la nei lo a, chet ṭhat erawh a nghah hle. Italy keeper hlui Walter Zenga chuan, "Group stage-ah khan tih tur a nei lo a, kei kum 61 mi pawhin ka veng thei ang. Chutihrualin mamawh hunah a che ṭha a, Kevin De Bruyne pawhin Donnarumma save lai hi a la mitthla ka ring. Gigio hian tlarhnung inrintawkna a pe a, world number 1 la ni thei ang," tiin Italy keeper a fak hle.

Kum 24 mi Unai Simon hi hming langsar lo zawk ni mah se kum 22 mi Donnarumma aiin nomawi a chawi tam tawh zawk. Simon hian Spain hi Euro Under 19 (2015) leh Euro Under 21 (2019) ah a champion pui ve ve tawh a, Supercopa de España-ah Athletic Bilbao a champion pui tawh bawk.

Italy keeper Donnarumma hian kum 2016 khan Supercoppa Italiana-ah AC Milan a champion pui a, a bak nomawi a la chawi lo. Donnarumma hi theihna nei sang zawk niin lang mah se Simon hian Spain hi penalty shootout-ah a chakpui tawh tlat.

Penalty Shootout
Penalty Shootout hmanga chak zawk zawn a ṭul a nih chuan Italy record a chhe zawk. Azzuri hian penalty shootout vawi 11 an hmachhawn tawhah vawi li chiah an chak. Euro 2016 khan quarterfinal-ah Germany an hneh lo.

Spain hian penalty shootout vawi 10 an hmachhawn tawh a, vawi ruk an chak. Chutihrualin team pahnih hian Euro inelna vawi khatah vawi hnih chak an la nei lo.

Italy record a ṭha hret
Italy leh Spain te hi inelna hrang hrangah vawi 37 zet an inhmachhawn tawh a, an intluk tawh hle. Ram pahnih hi vawi 11 ve ve chakin vawi 15 an inhnehtawk. Chutihrualin inelna lian World Cup leh European Championship-ah Azzuri record a ṭha hret.

Euro C'ship bikah ram pahnih hi vawi ruk an inhmachhawn tawh a, Italy vawi thum chakin Spain hi vawi khat an chak a, vawi thum an inhnehtawk. World Cup-ah pawh Italy hi vawi hnih an chak a, vawi hnih an inhnehtawk a, La Roja an la chak ve lo.

Chutihrualin FIFA World Cup 2018 khel tur zawnnaah ram pahnih hi group khatah an awm dun a, an inkhelh hmasak zawk ṭumin Turin-ah an inhmachhawn a, 1-1 in an inhnehtawk. Match hnuhnung zawk erawh Madrid-ah an inkhel a, Spain 3-0 in an chak.

Spain hi group hmahruaitu niin World Cup an khel a, Italy erawh playoff khelin Sweden an hneh loh avangin khawvel football inelna ber an khelh loh phah. Italy leh Sweden an inkhelh ṭum hian chanchin ngaihnawm tak a awm.

San Siro-ah Italy leh Sweden hi goal awm loin an inhnehtawk a, Solna-ah second leg an khel. Sweden-in Jakob Johansson hmangin minute 61-naah hma an hruai. Azzuri bench-ah hian tun ṭuma player pawimawh Lorenzo Insigne leh coaching staff zinga mi Daniele de Rossi te an awm.

Coach Giampiero Ventura-a'n De Rossi hi warm up turin a hriattir. Amaherawhchu Azzuri-in goal an mamawh avangin De Rossi hian coach thu hi a hnial a, Insigne chu warm up zawk se a ti. Italy hi 1-0 in an chak lo a, 1958 hnua a vawi khat nan World Cup an khel lo.

Inkhelh banah De Rossi chuan, "Inkhel a tawp dawn tawh si a, chak kan mamawh avangin striker in warm up awm zawk se tiin ka chhang. Insigne pawh ka kawk nghe nghe. Eng pawh chu ni se, tactical thil a ni a, ngaihdam ka dil. Kan coach pawh mi ṭha tak a ni," tiin a sawi.

Giampiero Ventura hian World Cup-ah Italy a hruai thlen theih loh avangin a hna a chan a, Roberto Mancini-a'n Azzuri hi enkawlin Manchester City manager hlui hnuaiah Insigne-a'n hmun pawimawh a chang zui a ni.