Max Verstappen a chungnung ber

'Champion, Champion' tiin a hmuna entu Dutch mipui an au rual a, an au hla hian tunlai Formula 1 boruak leh Max Verstappen chu champion tura an duhsakzia chiang takin a tarlang - beiseina nen an thlir mek zel.

Pathianni zana tlan zawh tak F1 Austrian Grand Prix-ah Verstappen a chungnung ber a, tun hnai intlansiak hnuhnung pangaah vawi li zet a chak ta; amah hnaih bertu Lewis Hamilton aiin point 32-in a sang fal ta.

Tun hnaiah Red Bull driver Verstap-pen a che ṭha fal, hei hian a vawi riat nana champion tum Hamilton dinhmun a ti derthawng viaua ngaih a ni; season chawhma lam chauh a la nih avangin thil thleng thei erawh a la tam.

Mercedes driver Hamilton-a'n beisei a phak hleithei lo a, palina dinhmun a luah hram - a hmaah hian a teammate Valtteri Bottas leh McLaren car khalhtu Lando Norris te an thleng ve thung.

A chungnung
Austrian GP an tlanna tlan kawng 'Red Bull Ring' hi Red Bull ta a ni a, F1 lama an team pawhin an hmang thiam hle. Austria hi Verstappen-a te ram Netherlands aṭangin a hla lem lo, 1016km vel chauha hla a ni - thlawhtheihna leh rel hmang chuan rei lote chhungin a thlen theih.

A hmuna en turin Dutch fans tam tak an pungkhawm a, an tlangval chhuanvawr Verstappen tan pawh hmun dang zawng aiin intlansiak a nuam ang tih a chiang. Qualifying lamah a che ṭha bawk a, a hmasa ber (pole) aṭangin a tlan ṭan.

Lap hmasa ber aṭangin Verstappen a tlan fal nghal, amah el phak tur Hamilton leh Norris te tan umphak chu thil huphurhawm tak a ni nghal der - lap 20 an tlan tlin phei chuan second 10 vel zetin a tlan hma fal tawh.

Red Bull driver hi a chesual duh lo, a tawp thlengin harsatna lian tham tawk loin a hmasa berah a tlan tluan thei. Tun ang zela a tlan a nih chuan season tawpah nomawi a chawi a nih pawhin a mak lo ang.

Kum 23 mi Verstappen chuan, "Duhthusama ṭha car kan nei a, hei baka ṭha hi chu beisei leh tur chuang a awm lo. Tyre kan hman apiang a fuh bawk, tuna kan boruak tawn hi chu ka theihna vang ni loin team thawhrah a ni," a ti.

Harh ngai Lewis
Season hmasa khan Mercedes tana a contract a hmang zo, nipui lai khan kumin atan chauh a pawtsei. Tunah chuan Hamilton-a'n season hnih chhung atan contract thar a ziak leh tawh a, intlansiakna huangah erawh beisei angin a che fuh thei rih lo.

Lap hnuhnung ber an tlan zawh dawn lamah a kual zau hret a, car pawhin a tuar. Tunah chuan atan nomawi humhim pawh thil awlsam a ni tawh dawn lo, champion hnem ber record thar siam a duh a nih chuan a harhchhuah vat a ngai tawh ang.

Britain tlangval Hamilton chuan, "Intlansiak hma khan Max hneh a harsat turzia hi ka hmu lawk a, ka sawi lawk bawk - chu chu a takin kan hmu. Kei leh kan team hian intlansiak leh a pawn lamah hmasawnna tur kan ngah," a ti.

F1 title lak hnem lamah Hamilton hian Michael Schumacher (7 titles) a nih rual tawh, mimala champion hnem ber a nih duh chuan nomawi dang a chawi leh a la ngai dawn - driver ṭha dang an rawn chhuah ve tak avangin a awlsam dawn lo niin a lang.

Hmabak Silverstone
Tun hnaiah a zawnin chawlhkar thum zet an intlansiak ta. Red Bull an chet ṭhat laiin Mercedes erawh an talbuai viau a, driver leh team pawhin harh thar an mamawh hle tih chu a lang chiang.

Kar khat an chawl dawn a, chumi hnuah British Grand Prix tlan turin an lo kir leh dawn. Silverstone tlankawngah hian mipui 140,000 vel an luh phalsak an ni dawn, a hmuna entu an tam dawn avangin a boruak a sang leh dawn.

Hamilton tan an rama intlanisak hi a nuam leh dawn, kum dangah pawh a chet ṭhatna hmun a ni ṭhin. Season kal laia a chet fuh hleih theih lohna pawh anmahni ramah ngei siamṭhat a tum ngei ang.

Car intlansiakna sang ber hi kuminah vawi 23 tlan tura ruahman a ni. A hmasa pakua an tlan tawh a, hri leng vanga ṭhulh a awm a nih ngawt loh chuan hmabak an la ngah - team leh driver tan dinhmun tidanglam turin hun a la tam tawk.