Match hnih chak a la ngai
Lionel Messi awmna Argentina tan Copa America 2021 champion ni turin match hnih chak a la ngai. La Albiceleste hian Nilaini zing dar 6:30 hian semifinal khel turin Colombia an hmachhawn ang.
World champion vawi hnih ni tawh Argentina hian Copa America 1993 hnu lamah nomawi lian tham an la chawi leh lo. South America ramte inelnaah hian final vawi li lut leh tawh mah se an chak lo vek, kuminah an sulhnu chhia hi thai reh ngei an tum.
Tukin zing hian champion lai Brazil leh Peru ten semifinal hmasa zawk an khel, ram pahnih hi inelna neih hnuhnung bera final khelte bawk kha an ni - a chak zawk hian Argentina leh Colombia inkhela chak zawk nen nomawi an inchuh dawn.
An ṭha tawk
Tlarhma lam an ṭha a, a hnunglam an ṭha tawk lo, tih hi Argentina an sawiselna leh an chak lohna lai a ni ṭhin. Tun Copa America-ah erawh Lionel Scaloni-a'n tlarhnung a remphui thei rih viau a, ṭum dang aiin beiseina pawh an nei sang.
Defender pawimawh Cristian Romero dinhmun la chiang lo mah se, tawnhriat nei ṭha Nicolas Otamendi leh German Pezzella te tlarhnung laiah an la inkawp thei - anni pahnih hian Ecuador lakah rintlak an nihzia an pholang tawh.
Tlarhma lamah chuan Messi thlawp turin Lautaro Martinez leh Angel Di Maria an awm, bench lamah Sergio Aguero an la nei cheu bawk - Colombia tlarhnung tan inven uluk a ngai dawn, inthlahdah zeuh pawh a thiang dawn lo.
Argentina manager Scaloni-a'n Messi chu khawvel player ṭha ber a nih thu a sawi a, a ṭhat dan ang taka a khelh chhuah theih nan an puih tur thu pawh a sawi tawh. Tun Copa bika goal li leh assist vawi li ve ve nei tawhtu puih hi thil harsa a ni lem lo ang.
Cuadrado a dam
Colombia hian tun inelnaah hian an player ṭha James Rodriguez chu hliam vangin an chhawr thei lo. Quarterfinal-a Uruguay an hneh ṭumin Juan Cuadrado a inlan thei lo bawk, tunah chuan Juventus midfielder hi a dam tawh.
Champion tura rinkai Uruguay hneh thei Reinaldo Rueda naute hi Argentina tan pawng tawng zuam ngawt chi an ni dawn lo. Atalanta tlarhma lama inkawp rem tak Duvan Zapata leh Luis Muriel te tlan dun hi dan an awlsam dawn lo.
Tottenham Hotspur defender, tharum ngah tak Davinson Sanchez leh Everton defender Yerry Mina te an la inkawp thei bawk a, tlarhnung lam pawh inrintawkna an nei sang hle ang tih a chiang. Luis Suarez leh Edinson Cavani te dang chat theitu an ni.
Mahse, Colombia hian tlang tur chuan La Albiceleste laka an record chhe tak an siamṭhat a ngai dawn. Ram pahnih hi vawi 40 an intawn tawhnaah Argentina hi vawi 23 an chak a, ṭum riat inhnehtawkin vawi kua chauh tlawm an nei - Colombia tan an hneh khat tak hneh a ngai dawn.
Inlan tura beisei:
Argentina (4-3-3): Emiliano Martinez, Gonzalo Montiel, German Pezzella, Nicolas Otamendi, Marcos Acuna, Rodrigo De Paul, Leandro Paredes, Exequiel Palacios, Lionel Messi, Lautaro Martinez, Angel Di Maria.
Colombia: (4-4-2): David Ospina, Daniel Munoz, Yerry Mina, Davinson Sanchez, William Tesillo, Juan Cuadrado, Wilmar Barrios, Gustavo Cuellar, Luis Diaz, Luis Muriel, Duvan Zapata.