Fans ti phur turin khelh ṭhat a ngai - Southgate

England coach Gareth Southgate chuan Wembley Stadium-ah semifinal khel dawn mah se fan-te puihna an mamawh a nih chuan an khelh ṭhat hmasak phawt a pawimawh thu a sawi.

Southgate chuan, "Fan-te awm dan tur hi ka hrilh tur niin ka hre lo. Kan match hnuhnung berah pawh khan an tih tur chu an hre khawp mai. A nihna dik takah chuan fan-te tih phur chu kan kuta awm a ni a, kan khelh ṭhat phawt a ngai a ni," a ti.

English coach chuan sawi chhunzawmin, "Ukraine nena kan inkhelah kha chuan kan khel ṭha a, fan-ten min pui ṭha bawk. Khami pahnih thawk kawp kha chu team tan ṭangkai tak a ni," a ti a, thiam takin fans puihna a dil.

England hian Euro 2020 semifinal lut turin Inrinni zan khan Ukraine chu 4-0 in an sawp a, Harry Kane chuan goal hnih khungin Harry Maguire leh Jordan Henderson ten goal khat ve ve an khung bawk.

Three Lions hian hnehna an chan hnuin England an thleng leh tawh a, Nilaini zana Denmark nena an semifinal khelh tur inbuatsaih nan St George’s Park lamah an inkulh leh tawh.

Euro 2020 hi khawpui 11 ngawtin inthlen ṭawm mah se semifinal leh final erawh Wembley Stadium-ah khelh a ni tawh dawn a, England tan chuan vanneihna a ni.

Wembley-ah hian semifinal chin chu mi 60,000 in a hmunah an en thei tawh dawn a, hei hi stadium len zawng aṭanga chhutin 75% a tling - stadium boruak a lian dawn.

Stadium-a inkhel en tur, kum 11 chin chunglam chuan Covid-19 hri danna an la tawh ngei tih lanna NHS app kaltlangin an lantir a ṭul dawn a, dose hnih ngei an la tur a ni a, inkhel en hma ni 14 aia rei tawh ami chu pawm a ni dawn lo.

Covid-19 hri danna dose hnih la lo an nih chuan hri an kai lo ngei a ni tih lantirna an ken a ṭul a, hei pawh hi darkar 48 liam ta aia rei chu pawm a ni lo ang.

UK secretary of State for Digital, Culture, Media and Sport Oliver Dowden chuan, "Hripui leng aṭanga dam lam kan pan mekna kawnga mel lung pawimawh a ni," tiin Euro semifinal leh final an thlen tur chu a sawi.

Khawthlang media-ten an tarlan dan chuan England leh Denmark inkhel tura mipui vantlang tana lei theih ticket hi he thu buatsaih a nih lai hian hralh zawh deuh thaw a ni tawh.

Hetihlai hian English FA lam chuan he inkhel aṭang hian a hranpain ticket 8,500 an chang a, Denmark chuan ticket 5,000 an dawng bawk - Danish team lam hian a tira dawn tur zata tih chu an tan a tam deuh avangin an la vek lo a, ticket 3,000 vel chu hei vang hian awm belh tura ngaih a ni.

England-ah chuan Denmark nena an inkhel tur bak hi titi a leng meuh tawh lo. BBC tarlan danin Ukraine nena an inkhel kha television lamah mi maktaduai 20.9 velin entu tam lai berin an en anga chhut a ni a, chawhrualin mi maktaduai 19.8 velin en reng ang an ni - kumina UK bika live-a pekchhuah, TV-a entu an tam ber ṭum a ni. Online kaltlangin iPlayer leh BBC Sport online-ah mi maktaduai 5.2-in an en bawk.