#LondonCalling Danish ho an inhrosa!

Denmark-in kum 1992 hnua a vawi khat nan Euro-pean championship-ah semifinal an lut a, Wembley Stadium-a inkhel tur an nih bawk avangin an ṭang hle - Nilaini zan dar 12:30-ah khelmual neitu England nen final luh an inchuh dawn.

Mahse, he team hian thu lawmawm lo an nei a, London-ah inkhel en turin Denmark fan-te an zin thei dawn lo - UK huam chhunga Danish mite chu an player-te au phur turin an inngen.

Denmark hi UK-in an ram chhunga zin tur, 'amber list' an tih zingah an telh. Chumi awmzia chu Denmark aṭang hian UK-ah hian a zin theih a, mahse, UK an thlen rualin ni 10 chhung tal an chhuah hmain an inkhunghran nghal a ngai.

Danish mipui tan UK-a inkhel en tura zin awmzia a awm lo tihna a ni a, lo zin ta pawh ni se an thlenna hotel velah television hmanga en bak an thei dawn chuang lo a ni.

Denmark mipuiten social media lamah chuan #LondonCalling tih 'hashtag' hmangin England nena an inkhel tur an ur lawk a, Danish FA commercial activities hotupa Ronnie Hansen chuan UK-a Danish mi awm tawh phawt chu inkhel en tura stadium-a kal turin a ngen.

Hansen chuan, "England-a awm Dane (Denmark mi sawina) zawng zawngte chuan he inbeihna hi an hmachhawn ve tur a ni.

"Dane mi, England-a cheng hriat in nei em? Khawvela fans ṭha berte meichher chu mit lo turin lo keng rawh rawh se. UK-a awm Dane mite tan ticket tam tak a awm a, inkhel an en ngei ngei a ngai a ni," a ti!

Denmark hian Euro 2020-a an match hmasa berah nikhaw hre loa a tluk avangin an thiampuipa Christian Eriksen chu an chhawr zui thei lo a, team tenau Finland chu 1-0 in an hneh lo zui.

Finland zawhah Belgium chu 2-1 in ngam lo leh mah se Russia lakah 4-1 a hnehna changin last 16 an lut a, Wales leh Czech Republic hnehin semifinal hial an lut ta - kum 1992 a an champion ang khan thil mak thlentir leh an tum ang.