Barca nena sawizawm Gosens a ṭawng chhuak

Germany-in Euro 2020-ah beisei phak lo mah se full back Robin Gosens erawh mipui mit la ber zinga mi a ni a, Serie A club Atalanta tana khel mek player hi Barcelona nen sawizawm mek a ni.

Gosens chuan, "European Championship chhung khan ka pa hnenah transfer chungchang min sawipui lo turin ka ti a, tunah chuan uluk takin kan en thei tawh ang," tiin amah duhtu club-te sawmna an thli thlai tur thu a sawi.

Kum 27 mi full back hian a pa chu a agent angin a hmang nghal a, a hma hun atan a pa thutlukna hi a pawimawh dawn tih a lang chiang.

Gosens chuan sawi zawmin, "Tunah chuan inah ka awm leh tawh a, ka pa nen titi dunin enge kan hmaah awmte kan sawi ang chu.

"Engmah ka hre lo tia ka sawi lai khan dawt ka sawi lo a, ka hre lo tak tak. Euro-ah chiah ka rilru ka pe a ni," a ti a, season tharah erawh club thar a neih ngei hmel hle.

Barcelona hian left back Jordi Alba chu hralh an tum nia sawi a ni a, Spain international hi Inter Milan lamin an thlithlai uluk hle - mahse, Alba hian Nou Camp chhuahsan a tum lo nia sawi a ni bawk.

Chutihrual chuan Junior Firpo chu a chhuak ngei dawn nia sawi a ni a, kum 24 mi left back hi Leeds United nen sawizawm mek a nih avangin Gosens hi Barca hian an mamawh hrim hrim niin a lang.

Gosens hian season hmasa khan Atalanta tan inelna hrang hrangah match 44 khelin goal 12 a khung a, assist vawi riat a nei thei.