Wolves-in Barcelona player an lalut

Premier League club Wolverhampton Wanderers chuan Barcelona aṭangin winger Francisco Trincao chu season khat chhung atan loan-in an lalut a, an duh a nih chuan a nghetin an lalut zui thei ang.

Wolves hian loan hun zawhah Trincao hi an lei ngei ngei tur a ni, tihna a ni lo a, an duhthlannaah a innghat dawn - a man atan euro maktaduai 30 bawr vel sen an inhuam a ṭul thung dawn a ni.

Kum 21 mi lek Trincao hian season hman zawh takah khan Barcelona tan league-ah match 28 khelin goal thum a khung a, assist vawi hnih a nei bawk.

Champions League-ah match sarih a khel a, goal thawhchhuah a nei lo thung - Copa del Rey-ah match nga a khel bawk a, a kum zat ngaihtuahin tawnhriat a nei chhe hran lo.

Wolves technical director Scott Sellars chuan, "Player hmuhnawm tak a ni a, mual sir lama tlan thei player neih tam hi kan duh bawk. Trincao hian ball a keng theiin a thiam em em bawk a, fan-ten hmuhnawm ti takin a inkhel an thlir ṭhin ka ring a ni," a ti.

Portugal tana vawi ruk inlan tawh Trincao hi Euro 2020-a an ram tana inlan tura koh zingah a tel lo a, kum 2018 European Under-18 Championship nomawi an chawi ṭum khan top scorer a ni thung.

Portuguese club Braga-ah a professional career ṭanin B team-ah a hun tam zawk a hmang a, kum 2018 khan first team tan a match hmasa ber lo khel tawh mah se 2019-20 season kha senior team squad-a awma top flight inelna a hmachhawn hmasak ber a ni thung.

Primeira Liga-a a season hmasa berah hian inelna hrang hrangah match 40 khelin goal kua a khung a, assist vawi 13 a nei bawk - season hmasa ṭan dawn khan euro maktaduai 31-in Barca a pan zui.

Wolves hian Trincao hma hian Yerson Mosquera an lo lalut tawh bawk a, kum 20 mi centre back hi Colombian club Atlético Nacional aṭangin kum nga chhung atan contract an ziahpui.

Premier League club Wolves hian coach thar Bruno Lage kaihhruaina hnuaiah inelna an hmachhawn dawn a, Portuguese coach hian player pahnih a lalut ta der tihna a ni.