Crystal Palace manager thar Vieira

Premier League club Crytsal Palace chuan coach thar atan Arsenal legend Patrick Vieira an lalut a, English coach tawnhriat nei ṭha Roy Hodgson-a hmun ruak a luah dawn tihna a ni.

Kum 45 mi coach hian Selhurst Park-ah kum thum chhung cham turin contract a ziak a, season hmasaa 14-na ni chunga season khartu team hi a aia sang zawk thlen tumin a enkawl ang.

Arsenal captain hlui Vieira chuan, "Premier League-a kir leh theihna remchang ka nei hi ka lawm takzet a ni. Club chairman Steve Parish leh sporting director Dougie Freedman te nen inbiakna thui tak kan kalpui hnuah he club leh academy tana an hmachhawpte hian min ti phur takzet a ni.

"He club hian Premier League-ah rei tak hun an hman tawh avangin an indin nghet tawh a, he club hmasawn zelna tur hian tha ka thawh ve theih ngei ka inring tlat a ni," tiin London club a zawm thei chu a lawm hle.

Arsenal tan (1996-2005) kum kua a khelh chhunga nomawi liantham pasarih zet lo chawi tawh Vieira hian player ang chuan tawnhriat a nei ṭha hle - France tan World Cup leh Euro nomawi a chawi tawh bawk.

Gunners a chhuahsan hnuah Juventus leh Inter Milan a zawm a, Milan club tan Serie A nomawi pathum ngawt a chawi zui - kum 2009 khan Premier League-ah lo kirin Manchester City tan a khel a, FA Cup nomawi a chawipui hnuah kum 2011 khan inkhelh a chawlhsan thu a puang.

Inkhelh a chawlhsan hnuah coaching lamah a kal a, City academy lama a inzir hnuin Major League Soccer club New York City chu kum 2016 khan a enkawl ṭan a, playoff-ah vawi hnih a hruai thleng.

June 2018 khan New York club hi chhuahsanin Ligue 1 club Nice a zawm a, season tluan a enkawl pahnihah pasarihna leh pangana nihpuiin December 2020 khan a hna aṭangin an ban.

Palace chairman Parish chuan, "Vieira hi City group-ah a inzir viau tawh a, New York leh Europa League khel tur hiala a hruai thlen Nice-ah hna ṭha tak a thawk bawk.

"Hmachhawp tam tak kan nei a, Partick leh Dougie te nen season duhawm tak kan hman theih nana player lakluh tur kan buaipui hun tur ka nghakhlel tawh takzet a ni," tiin a sawi.

Palace hian Borussia Dortmund boss hlui Lucien Favre pawh inbiakna an neihpui hman a, mahse, December 2020-a German club-in an ban tak coach hian football aṭanga chawlh rih a thlang leh zawk si a ni.