EPL khel leh duh Coutinho

Barcelona forward Philippe Coutinho chu Premier League lamah a kir leh duh niin a agent Kia Joorabchian chuan a sawi. English club tam takin an tana khel turin an la duh ngei ang tih a chiang.

Brazil international hian Liverpool chhuah-sanin beiseina sang tak nen Barcelona a pan a, Catalan club-ah hian beisei angin a hlawhtling tawk lo, hmun nghet a chang hlei thei lo bawk.

La Liga champion Barca aṭang hian Bayern Munich lamah loan hmanga kaltir a ni a, German champion tan hian inelna hrang hrangah match 22 a khelh aṭangin goal riat a khung - a khel ṭha pangngai viau.

Amaherawhchhu, manager thar Hans-Dieter Flick a rawn lan chinah hmun a chang mumal leh tawh lo. Kum 27 mi chauh a la ni a, a khelh tam theihna tur hmuna awm a duh a nih pawhin a mak hran lo.

Joorabchian chuan, "A rilruah chuan Premier League hi a la awm reng, engtik niah emaw chuan a la kir leh ka ring. A kir ka ring ka tih vang hian kumin tihna erawh a ni kher lo, tun dinhmunah chuan engmah kan la sawi dun lem lo.

"Media ṭhenkhat chuan a man zat leh a kalna tur awm thlengin an sawi ka hre tawh, kei leh ani chuan hetiang thu hi kan la sawi dun lo," tiin a sawi. Tunah chuan Coutinho hi Bayern tan a khel mek a, club dang a zawm a nih loh chuan a loan hun zawh hunah Barca lamah a let leh mai ang.