Sorkar kuta awm French Open

French Tennis Federation chuan 2020 French Open an khelh tur chu an duhthusamah chuan a hmuna entu awm an duh a, chutihrualin a hmuna entu awm leh awm loh erawh sorkar thutlukna an ngaihchan a ngai dawn.

Clay court inelna lian hi May thlaa khelh tur kha ni mah se hripui Covid-19 vangin a hun sawn a ni. Sptember thla tawp lamah khelh tum a ni, Paris khawpuiah inelna an nei ngei dawn em tih pawh sorkarin an remtih loh chuan an nei thei chuang lo ang.

French Tennis Federation president Bernard Giudicelli chuan, "Kan duhthusamah chuan Roland Garros hi a hmunah a tam thei ang berin en thei se tih a ni. Chutihrualin a hun a la hla a, thil thleng thei tam tak a la awm.

"Khawvel dinhmun thlir a ngai a, kan ram hriselna dinhmun chhut tel a ngai bawk. Keini lam chuan duh leh beisei dan kan nei thei a, thutlukna tawp erawh sorkar lamin an siam tur a ni ang," tiin a sawi.

March thla aṭang khan professional tennis chu neih a ni tawh lo; Wimbledon pawh ṭhulh fel a ni tawh. Tuna an beisei dan chuan July thla chawhnu lamah chuan inelna neih leh theih an inring.

Grand Slam pali zinga pakhat US Open pawh August thla tawp aṭanga khel ṭanin September thlatir lamah zawh theih an la inring. US Open khelhna hi hri len nasatna New York khawpui a nih vang erawh chuan thutawp an la siam thei bik lo.