Coutinho-a'n Liverpool a hawisan

Barcelona chuan Liverpool midfielder Philippe Coutinho chu pound makatduai 142-in an lei dawn.

Reds hian a tirah pound makatduai 105 an dawng nghal dawn a, a bak hi chu a hnu lama inpek zui tur a ni ang. Brazilian midfielder leina man hi British transfer record a ni.

Kum 25 mi Coutinho hian Nou Camp-ah kum nga leh a chanve daih contract a ziak dawn a, lei chhuak tur tan pound maktaduai 355 sen ngam a ngai dawn. Inter Milan aṭanga pound maktaduai 8.5 chauha Anfield pantu hi a thiamna san em avangin a man a pung chak hle.

Nikum nipui transfer lai khan Barcelona hian pound maktaduai 200 zetin Neymar chu Paris St-Germain hnenah an hralh a, Brazil captain hi khawvel player manto ber a ni. PSG tho hian loan hmanga an hawh lai Kylian Mbappe chu season tawp rual hian AS Monaco aṭangin pound maktaduai 165.7 in an la nghet dawn; Coutinho hi khawvel player manto pathumna a ni ang.

Dan rual loh
La Liga hmahruaitu Barce­lona hian nipui bazar lai khan Coutinho hi lakluh tumin Liverpool vawi thum an dawr a, mah se Premier League club lamin an hnar vek. Reds hian an player duh lai chelh turin Barca dilna pound maktaduai 118 an hnawl hial a, amaherawhchu Coutinho berin chhuah a duh miau avangin English club tan tih theih a tlem hle.

Liverpool boss Jurgen Klopp-a'n an chelh theihna tur a nih chuan theihtawpa an ṭan tur thu a sawi tawh a, tunah erawh Klopp tan duhsakna thu sawi bak tih theih a awm tawh lo.

German manager Klopp chuan, "Coutinho nen hian thinlung takin kan inpawh a, kei leh a ṭhiante hian a chhuak tur hi pawi kan ti hle. Ṭha taka a khelh chhunzawm kan duhsak," tiin a sawi a. Reds boss Klopp hian Coutinho-a'n Barca a thlang nghal a, Liverpool jersey ha zel turin thlem theih a nih tawh loh thu a sawi lang bawk.

Kop hliamtu Coutinho
Coutinho hian nipui trans­fer-a Barcelona pan a tum avangin Reds tan a inlan tlem a, khelmuala a inlan hnuah erawh rinrawl ni ni phakin a che ṭha nghal. Brazilian midfielder hian tun season league match 14 lekah goal 7 a khung a, inelna hrang hrangah goal 12 a khung tawh.

Fab Four tiha an sawi Coutinho, Roberto Firmino, Sadio Mane leh Mohamed Salah te zingah pawh ani hi chu dah san ber a ni a, heng player ṭha pali nen hi chuan Liverpool ṭantu ruhkawl Kop pawhin an club vanglai hmang nawn leh tura suangtuahna a neih a nih pawhin an demawm loh.

Barca-in Liverpool hma­chhuan SAS tiha an vuah Daniel Sturridge leh Luis Suarez te inkawp chu ṭhiah sakin Uruguayan forward hi an chhuhsak tawh a, Suarez-a thlakna an hmuh zawh loh ang thoin Coutinho thlakna hmuh a harsa dawn. Kop natna belhchhah turin Coutinho hian Barcelona hi a thlang a, Premier League ṭan hmaa Europe club ropui ni ṭhin Liverpool an ropui tawh lo tih a nemnghet.

Reds hian Coutinho hming chuanna jersey leite chu refund an phalsak dawn. Amaherawhchu hei hian Kop rilru na a thawi dam pha lo a, Liverpool official calendar-ah Coutinho hi January thlaa a lan avangin season ṭantirh lama mahni club ṭan ber calendar chhuang taka leite pawhin tun thla chhung chu an dah ṭhat rih a ṭul dawn a ni!

Nou Camp lamah
Barcelona chuan Courtinho an lakluh thu an sawi chiang tawh a, transfer leh player thar pholanna neih thuai a nih tur thu an sawi bawk. Barcelona jersey siamtu Nike chuan an advertisement lamah Philippe Coutinho hming chuanna kawr an tarlang der tawh.

Brazil international Coutinho hian Reds tan hliam vangin tun hnai match hnih a khel thei lo a, a club thar tan league lama chhawr zui theih tur a ni thung ang. Champions League lamah erawh Merseyside club tan a inlan tawh avangin tun season chhung bik chu Barca tan European football-ah a inlan thei dawn lo.

Coutinho hi midfielder ni chungin goal khung thei tak a ni a, Barcelona hma tawng Lionel Messi leh Luis Suarez te thlawptu a ni dawn a, khelmual sirah ball thiam Ousmane Dembele an neih bawk avangin Catalan club pawhin an ṭhatpui ngei ang.