Vawiin aṭangin Santosh Trophy

Santosh Trophy 2018 - NorthEast Zone Qualifying Round chu vawiin aṭangin Lam­mualah khelh ṭan a ni dawn. Tlai dar 2:00 hian Assam leh Arunachal Pradesh te an inkhel a, vawiina inlan tur Group A hi inelna thlengtu Mizo­ram awmna group an ni.

NE Zone Qualifying Round-ah hian team paruk an inlan dawn a, group hnihah ṭhenhran niin an inkhelh chhuah hnuah group hmahruaitu ve vein final round an lut dawn. Group B-ah hian Manipur, Meghalaya leh Tripura te an awm.

North East state zing­ah Mizoramin tun hnaiah record a nei ṭha ber a, kum 2014-a an champion hnuah final round an la khel ziah.

Group A-ah Mizoram chu rinkai an ni a, an elpui ber tur chu Assam an ni a, Arunachal Pradesh chu nem ber tura ngaih a ni.

Mizoramin Assam leh Arunachal Pradesh result hre sain an khel dawn a, hei hi an vanneihna tur a ni.

Kum 2014 khan qua­lifying round-ah Manipur leh Mizoram chu match hnu­hnung berah an khel a, hemi ṭum hian Mizoram goal diffe­rence a chhiat zawk avangin match hnuhnung berah chak a ngaih phah a, Mizo mipui tan inkhel erawh a hmuhnawm phah thung.

Group khat aṭangin team pakhat tan chiah final round-ah hmun zuah a nih avangin match zawng zawng a pawimawh dawn.

Assam hian nikum khan Meghalaya an hneh loh avangin final round an thleng zo lo a, kum 2016 leh 2015-ah erawh Meghalaya leh Manipur hnehin final round an lut a, team chhia an ni lo.

Arunachal Pradesh erawh a tikimtu tiha sawi theih an ni a, qualifying round hnuhnung paliah ṭum khat inlan loh an nei a. An inlan ṭumah pawh hian chak an nei lo, table mawngphah lamah awm ziahin match riat an khelhah vawi sarih an chak lo.

Group B lamah Manipur leh Meghalaya te chu team ṭha an ni a, Mizoram tih loha North­East aṭanga champion thei awm chhun Manipur hian 2014 aṭangin final round an lut tawh lo.

Group A
January 8, Thawhṭanni
2:00 PM Assam Vs Arunachal Pradesh
January 10, Nilaini
2:00 PM Arunachal Pradesh Vs Mizoram
January 12, Zirtawpni
2:00 PM Mizoram vs Assam

Group B
January 9, Thawhlehni
2:00 PM Tripura Vs Manipur
January 11, Ningani
20:00 PM Meghalaya Vs Tripura
January 13, Inrinni
10:00 AM Manipur Vs Meghalaya