MFA Futsal League 'kick off' a ni ta : Naktuk zanah inkhel ṭan dawn
Mizo ṭhalaite nghahhlelh, Mizoram Football Association Futsal League chu January 5 zan khan Chanmari YMA Hall-ah 'kick off' a ni ta - naktuk zanah R. Dengṭhuama Multipurpose Hall, Mualpuiah inkhel an ṭan ang.
MFA Futsal League hi minister of state KS Thanga'n a kick off a, Mizo ṭhalaite'n bung thar an kaina tur a nih thu leh futsal hmangin India ramah Mizote'n hming an chher ngei a beisei thu a sawi.
C Laltlantlanga, Secretary, MSSC chuan MFA League Handbook a tlangzarh bawk.
MFA Futsal
Inlawmna thu sawitu MFA honorary secretary Lalnghinglova Hmar chuan FIFA-in futsal huang zauh tura hma a lak dante a sawi a, Asian Football Confederation (AFC) lamin futsal chu tih tak takaha kalpui tawh thu leh, AFC lamin All India Football Federation chu futsal lama ṭan la tura a tih thu a sawi.
AIFF hian futsal bul ṭantu tur state a thlan zingah Mizoram chu telin AFC Level I Futsal Course chu Aizawlah AFC leh AIFF lamin an buatsaih tawh a, Mizoram futsal referee-te pawh AFC hnuaiah training pek an ni. Heng mite thiamna hmang ṭangkaiin, Mizo ṭhalaite tan India rama FIFA-AFC-AIFF hriatpui futsal league hmasa ber ṭan a nih tur thu a sawi lang.
Kick off zan chu
Zirtawpni zanah hian MFA Futsal League khel tur team 16-a player leh official-te an kal ṭha hle a, zaithiam zai ngaihthlak a nih bakah team model-te'n jersey an pholang a, captain-te'n team aiawhin thu an tiam bawk.
Team 16-te hi group hnihah ṭhen an niin Mark Lalduhsaka, MFA marketing officer kaihhruainain an group awmna tur pawh fel a ni a, group khata awmte hi an inkhel kual chhuak ang a, a sang pali ve vein quarterfinal an khel ang. Group pahniha a hniam ber ve vete erawh season tharah Division One lamah an tla thla thung dawn a ni.
Futsal League
Team 16-te hian inbuatsaihna ṭha tak an nei a, Mizorama footballer langsar ber berte pawh hmuh tur an awm dawn a, futsal lama insawrbing rawlthar ṭha tak tak hmuh tur an awm bawk ang.
League-ah hian Nivia ball hman tur a ni a, India rama infiamna bungraw siamtu lar Nivia-in MFA tan bik futsal ball an siam a, MFA logo an nemkai a ni.
Zan khatah inkhel pali awmin 6:00 PM, 7:10 PM, 8:20 PM leh 9:30 PM-ahte inkhel a awm ṭhin ang - inkhel hi Zonet Cable TV chuan live-in a pe chhuak vek ang.
Inkhel en man hi Rs 20/- a ni ang.
Fixtures
GROUP A
Round 1 - January 9, Thawhlehni
6:00 PM Dawrpui Veng vs Chanmari
7:10 PM Electric Veng vs Chhinga Veng
8:20 PM Bawngkawn vs Saron Veng
9:30 PM Bungkawn vs Kanan Veng
Round 2 - January 11, Ningani
6:00 PM Kanan Veng vs Bawngkawn
7:10 PM Saron Veng vs Bungkawn
8:20 PM Chhinga Veng vs Dawrpui Veng
9:30 PM Chanmari vs Electric Veng
GROUP B
Round 1 - January 10, Nilaini
6:00 PM Ramhlun South vs Ramhlun Venglai
7:10 PM Durtlang vs Ramthar Veng
8:20 PM Laipuitlang vs Dinthar
9:30 PM Ramhlun North vs Armed Veng South
Round 2 - January 12, Zirtawpni
6:00 PM Armed Veng South vs Laipuitlang
7:10 PM Dinthar vs Ramhlun North
8:20 PM Ramthar Veng vs Ramhlun South
9:30 PM Ramhlun Venglai vs Durtlang