Salt Lake-ah Aizawl FC an tlawm

I League champion lai Aizawl FC chuan nimin tlai khan mualneitu Mohun Bagan 0-2 in an hneh lo.

Mariners-in coach thar Sankar Lal Chakraborty hnuaiah hnehna an chang nghal a, Mizo club erawh a zawna vawi hnih an chak hnuah tun season-a a vawi hnih nan an chak lo.

Salt Lake Stadium-ah Bagan wing back Ricky Lallawmawma cross chu Masih Saighani-a'n minute 53-naah an lamah a pet lut a; season liam taa top scorer Asier Pierrick Dipanda Dicka-a'n minute 75-naah tun season-a a goal ngana a khung leh bawk. Mariners-in inkhel an thunun a, chak phu zawk an ni.

MK-a tel lohna
Aizawl FC forward H. Lalmuan­kima'n ISL club FC Goa a zawm avangin MPL6 best forward tel loin a vawi khat nan an inlan a, hei erawh chhuanlam a tling lo. Mohun Bagan-in hliam vangin an chhuanvawr Sony Norde leh midfielder pawimawh Yuta Kinowaki an chhawr thei bik lo.

Aizawl FC-in bul an ṭan chhe lo a, Mohun Bagan an chungnung bik lo. Nigerian defender Kareem Omolaja Nurain-a'n minute 14-na lekah hla tak aṭangin kawh zetin a pet a, Bagan keeper Shilton Paul tan dan rual ni lo mah se goal ban a per avangin Kolkata club an him.

Bagan an lian
Mohun Bagan-in inkhel an thunun zui a, first half-ah Aizawl FC an ṭang­tluan hram. Cameroonian forward Dipanda Dicka-a'n AFC tlarhnung tan buaina a siam a, Nikhil Kadam-a'n goal khung theihna hun ṭha ṭum hnih a bawhpelh bakah Eze Kingsley-a'n a club hlui lama a tauh lut tur chu goalline aṭangin Mama'n a tauh chhuah sak bawk.

Second half-ah AFC an insiam ṭha lo a, Mizo tlangval Ricky-a cross chu Afghan defender Masih-a'n a tlawh goal a, Kolkata club-in phur phah nana an hman laiin Mizo club an hnual.

Liberian forward Ansumana Kromah-a'n goal ruakah a tauh lut loin goal ban a tauh ber a, amaherawhchu AFC vanneihnain a tlin lo.

Minute 75-naah Dipanda Dicka-a'n AFC offside trap a bum hnuah keeper Avilash bumin goal ruakah a khung. Mizo club-in goal dang chhuah tawh loin Mohun Bagan 2-0 in an chak.

Engtin zel?
Aizawl FC-in point 10 hmuin parukna an la ni zel a, hmahruaitu East Bengal point sarihin an pha lo a, match hnihin an khel tlem bawk.

Mizo club hian January 13, Inrinni tlai dar 2:00 hian an hnuai chiaha awm Chennai City an mikhual ang.