Rinkai chak zanah Chelsea chak zo lo

Inrinni zan FA Cup inkhelah Chelsea chu Championship club Norwich City nen goal awm loin an inhnehtawk a, London club tan result duhawm loh ni mah se Stamford Bridge-ah replay an khelh leh dawn avangin round sang zawk an thlen ngei a la rinawm.

Premier League club lian dang Manchester City, Manchester United leh Liverpool ten an khingpui an hneh vek a, khawvel knockout football inelna upa ber FA Cup third round-ah beisei loh result lian tham hriat tur a la awm lo a. Nizan khan Arsenal leh Tottenham Hotspur te an inlan a, result kan hre hman lo.

Tlarhma bil
Chelsea manager Antonio Conte-a'n Arsenal nen an inkhelh ṭuma inkhel bul ṭantu aṭangin player pakua zet a thlak a, Gary Cahill leh Tiemoue Bakayoko te chiahin bul an ṭan nawn. Player pawimawh dang Cesar Azpilicueta, Marcos Alonso leh N'Golo Kante te phei chu inkhel turin an zin ve lo a, Blues bench-ah hian kum 18 leh hnuai lam player pali ngawt an awm.

Blues kim tawk lohna khelmual chhungah a lang a, first half-ah Norwich City-in inkhel an thunun. Championship-a 13-na ni mek Canaries tlarhma a bil ve tho a, goal attempt vawi kua an neihah goal zawnah vawi khatmah an pet lo.

Second half-ah Conte hote insiamṭha mah se Kenedy, Pedro leh Michy Batshuayi te Championship club player-te lakah an danglam bik lo a, goal an khung thei lo.

Chelsea manager Antonio Conte chuan, "Khualmualah kan khel a, kan theihna zawng zawng chhuah mah ila kan result duh ang a ni lo. Match khelh tur tam tak awm lai a, match khat khelh tur awm belh leh hi pawi kan ti a, chutihrualin Norwich khan replay khelh hi an phu a ni," tiin an khel ṭha lo tih a pawm.

City nge nge
Etihad Stadium-ah Manchester City-in harsatna an tawk a, first half-ah mikhual Burnley-in Ashley Barnes hmangin goal an khung hmasa a, Clarets-in City tlarhma an veng ṭha bawk.

Second half-ah City dang daih an inlan a, minute 56-naah Sergio Aguero-a'n siphurh sutin Argentine forward hian minute hnuah a khung belh a, Burnley an zawr chhunzawm. Pep Guardiola hote tan Leroy Sane leh Bernardo Silva ten an khung belh a, 4-1 in an chak.

Pep Guardiola chuan, "Ka thuhnuaia Sergio Aguero a awm thei hi ka lawm a, ani chuan inkhelh hi a duh avanga a changa a lungawi lo hi ka hriatthiam pui. Kei chuan amah hi hlim se ka duh a ni," tiin lungawi loh vanga chhuak tura an sawi Aguero chungchang a sawi.

United tan Lingard
Zirtawpni zana Manchester United leh Derby County te inkhelh ṭumin goal a lut lawk lo a, danglamna thlentu chu Jesse Lingard a ni. United pum chhuak Lingard hian minute 84-naah substitute Romelu Lukaku pass chu yard 20-na aṭangin kawh zetin a pet goal a, Belgian striker Lukaku hian minute 90-naah chak nemnghehna goal a khung leh bawk.

Derby hi Championship-ah pahnihna a ni mek a, Old Trafford-ah pawh mualneitu tan buaina tham an tling. United keeper David de Gea aia lut Sergio Romero chuan Tom Lawrence goal khung tur dang lo se result hi dang thei a ni.

A hming chu Van Dijk
Liverpool manager Jurgen Klopp-a'n khawvela defender manto ber Virgil van Dijk chu Everton hmachhawn turin inkhel bul a ṭantir a, Dutch defender hian minute 84-naah chakna goal a tauh lut. Merseyside Derby-a chakna goal khung hi a chhinchhiahtlak a, Van Dijk tan bul ṭan dan duhthusam a ni.

Anfield-ah Reds-in minute 35-naa James Milner penalty hmangin hma an hruai a, Everton tan Gylfi Sigurdsson-a'n minute 67-naah a sut. Liverpool-in hliam vangin forward Mohamed Salah an chhawr thei lo a, Barcelona pan tur Philippe Coutinho an hmang thei lo bawk. Toffees lakah Liverpool-in goal venghim tura an lakluh Van Dijk hmangin mamawh chhanna goal an hmu a, Dutch defender hi Red ṭantu ruhkawl Kop zingah a tla na nghal khawp ang.

Liverpool manager Jurgen Klopp chuan, "Virgil van Dijk tan match hmasa bera goal khung hi a hlu a, a tauh luh dan pawh a ṭha a ni. Ka lawmpui a, Kop hmaah ngei goal a khung khan a goal khung kha a tihlu lehzual," tiin a sawi.