Costa tan goal leh red card

Diego Costa-a'n a hmangaih hmasa Atletico Madrid tana La Liga match hmasa ber a khelh zanah goal a khung nghal a, a goal khung a lawm dan avangin Chelsea striker hlui hi hnawhchhuah zui nghal a ni.

Inrinni zan inkhelah Atletico tan Angel Correa chuan minute 18-naah goal hmahruai khungin, second half-ah Costa-a'n an goal hnihna a khung. Spain international Costa hi goal a khung hmain yellow card pek a ni tawh a, a goal khung lawm nan fans bula a tlan luh avangin yellow card pahnihna pek a ni zui bawk.

Kum 29 mi Costa hian Nilaini zan khan Ateltico tan hian Copa del Rey-ah goal a khung tawh bawk a, a match hmasa pahnihah goal a khung avangin bul ṭan dan ṭha tak a ni. Mahse, nungchang vanga buai fo Costa hian a theihna a lantir rualin inthunun theihna a la tlachham tih a hriat theih.

Simeone thukhawchang
Atletico Madrid manager Diego Simeone chuan, "Goal nawr kawngah "Diego Costa kha a ṭangkai hle. Goal khung a lawm dan kha ka hrethiam, lawm avanga fans bula tlan kha thil mak a ni lo. Costa aṭang hian thil ṭha hmuh kan duh a, a pawimawh ber erawh goal khung kha a ni," tiin Costa chuan nungchang ṭha a neih chhunzawm a beisei thu a sawi.

Argentine manager Simone hian referee thutlukna an zah thu a sawi a, "Dan leh hrai zawm hi a pawimawh a, kan tih ṭheuh tur a ni. Ka naute khelh danah ka lawm a, tharum ngah Costa kan neih belh tak avang hian kan goal nawr pawh a na zual sawt ngei ang, amah thlawp tur hian player dang pawh an ṭha tawk a ni," a ti.

Atletico Madrid hian league match 18 khelhah point 39 hmuin hmahruaitu Barcelona chu point rukin an phak lo. Catalan club hian nizan khan Levante an hmachhawn a, an inkhel result a zirin an inthlauhna hi a la danglam leh thei bawk.

Inrinni zan inkhel dangah season hmang ṭha tak Valencia chuan Girona lakah 2-1 in hnehna an chang a, point 37 hmuin pathumna an ni–champion lai Real Madrid aiin point rukin an sang zawk. Real Betis lakah Sevilla an tlawm laiin Eibar chuan table mawngphaha awm Las Palmas an hneh thung.