World number 1 lakah Sindhu a chak

Premier Badminton League khelh mekah Inrinni zan khan PV Sindhu chuan world number 1 Tai Tzu Ying chu inkhel inhnehtawk takah 15-11, 10-15, 15-12 a hnehin, Indian shuttler hian Chennai Smashers chu Ahmedabad Smash Masters lakah 2-1 in hnehna a chanpui.

Khawvel player ṭha pahnihte hi nikum Rio Olympic khan an intawng tawh bawk, Rio-ah Sindhu hian hnehna changin quarterfinal a lut a, silver medal a hlawh chhuak zui bawk.

Mahse, hemi hnuah hian Chinese Taipei hian hnunglam a hawi tawh lo, nikum chhung khan tournament a khelh zawng zawngah hnehna a chang vek a, Hong Kong Open final-ah Sindhu hi a hneh let bawk.

Team pariat inelna PBL-ah Tai Tzu Ying-i khelhna Ahmedabad Smash Masters hian match li khelhah point 12 hmuin semifinal lut thei dinhmunah an ding mek. Chennai team erawh point kua hmuin pasaihna an ni mek thung.

Zirtawpni zan khan North Eastern Warriors chuan tun season PBL-a a vawi khat nan hnehna an chang ve. Jawaharlal Nehru Indoor Stadium-a inkhelah North Eastern Warriors hian Bengaluru Blasters lakah 3-2 a hnehna changin point 11 an hmu a, an chunga awm Delhi Dashers nen an la inkhelh dawn avangin semifinal beiseina an la nei thei ang.