Ligue 1 club neitu ṭhenkhat an lungawi lo

French Ligue 1 chu coronavirus vangin khelh zawh theih a ni lo a, he thutlukna vang hian club ṭhenkhat an lungawi lo; tun hnai khan club neitu lamin an lawm loh thu an sawi chhuak.

France prime minister Edouard Philippe-a'n an ramah infiamna lian tham chhunzawm mai theih an rin loh thu a sawi a. April thla khan Ligue 1 thuneitu lam chuan an league an titawp zui nghal.

Champion lai leh fal taka hmahruai mektu Paris Saint-Germain hnenah nomawi an hlan a, anni bakah hian Marseille leh Rennes ten Champions League khelin, Europa League-ah Lille an inlan thung ang.

A hniam lama awm Toulouse leh Amiens te chu Ligue 2 lamah an tlahniam, hun rei tak hnuah Lyon chuan European football an khel phak dawn lo bawk - Lyon hian an dikna chanvo ang an hmu loah an ngai a, court lamah an zualko tawh hial.

Nantes neitu sumdawng hausa Waldemar Kita chuan, "April thaltirah kha chuan European league lian panga zingah keini kha khelh chhunzawm leh theih beisei hmasa kan ni a, a hnu lawkah erawh thutlukna danglam tak siam a ni leh si.

"Keini ramah chuan hian football hi khelh chhunzawm a ngam awm loh a ni mai thei," tiin an lungawi loh thu a sawi. Bundesliga an khel ṭan leh tawh a, Premier League, La Liga leh Serie A pawh June thla chhungin an khel chhunzawm leh vek dawn.

Saint-Etienne neitu zinga mi Bernard Caiazzo chuan, "Sorkar lamin thutlukna tlang takin an puang nghal a, club leh player lam biak rawnna a awm lo. Hetiang thutlukna lian, club mai bakah mipui tam tak nghawng thei hi siam dawn chuan zau zawka ngaihtuah a ṭha," a ti.