Entu awm lo chuan a hrehawm - Kvitova

Petra Kvitova chuan entu awm loa tennis khelh chu thil tih theih ni tho mah se a nawmna a awm tam lo tih a sawi a, court chhungah player an khawhar thu a sawi tel bawk.

Wimbledon champion hlui Kvitova hian tennis a khelh hun chhungin nomawi 27 a chawi tling tawh, kar hmasa khan a hmuna entu awm loa khelh All-Czech Exhibition Tournament-ah hlawhtlinna a chang leh bawk, an ram chhunga awm player bikte tana siam a ni.

Kum 30 mi Kvitova chuan, "Hlawhtlinna ka chang kha ka lawm, eng inelna pawh ni se a chung bera awm chu a hluin a ropui ṭhin. Mahse stadium ruakah kan inkhel a, tih dik leh tih sual changin thawm hriat tur a awm lo chu a khawhar thlak takzet.

"Tennis season a khaihlak mek a, tunah hian inelna ṭhenkhat chu a hmuna entu awm loin kalpui an tum niin ka hria, duhthlan tur dang a awm miau loh avangin inelna buatsaihtu lam pawh dem theih an ni lo. Chutihrualin entu awm lo chuan tennis chu a holam hle," a ti.